Моссад Исроил разведкаси раҳбари Давид Барнеа шу ҳафта Вашингтонга ташриф буюриб, АҚШдан Ғазодаги юз минглаб фаластинликларни қабул қилишга тайёр давлатлар билан музокараларда кўмаклашишни илтимос қилди. Бу ҳақда Axios ташриф тафсилотларидан хабардор манбаларга асосланиб хабар бермоқда.
Барнеа Оқ уйнинг махсус вакили Стив Уиткоффга Исроил аллақачон Эфиопия, Индонезия ва Ливия билан мулоқот олиб бораётганини маълум қилган. Унинг айтишича, бу мамлакатлар кўчиб келувчиларни қабул қилишга нисбатан маълум “очиқлик” билдирган. Шунингдек, у АҚШдан ушбу давлатларни розиликка ундаш учун дипломатик ва иқтисодий рағбатлардан фойдаланишни сўраган.
Манбаларнинг хабар беришича, Уиткофф аниқ жавоб бермаган, Трамп маъмурияти эса ҳозирча расмий нуқтаи назарини билдирмаган. Оқ уй, Нетаньяху идораси ва юқорида тилга олинган мамлакатлар Ташқи ишлар вазирликлари изоҳ беришдан бош тортган.
Февраль ойида Дональд Трамп Ғазонинг икки миллион аҳолисини тўлиқ “эвакуация қилиш”ни таклиф этган эди, бироқ бу ташаббус араб давлатлари ва жаҳон жамоатчилиги томонидан кескин танқидга учради ва шундан сўнг тўхтатиб қўйилди. Шундай бўлса-да, Исроил амалдорларининг таъкидлашича, АҚШ агар Исроил бу режани амалга оширмоқчи бўлса, кўчириш учун мамлакатларни ўзи топиши кераклигини тушунтирган.
Маълумотларга кўра, Исроил Ғазонинг барча аҳолисини Миср билан чегарадаги “гуманитар ҳудуд”га жойлаштириш режасини ишлаб чиқишда давом этмоқда. Бу эса Қоҳира ва Ғарб пойтахтларини ташвишга солмоқда. Нетаньяху ҳукумати кўчиришни “ихтиёрий” деб атаётган бўлса-да, ҳуқуқ ҳимоячилари ва ҳуқуқшунослар, жумладан, АҚШ ва Исроилдагилар ҳам — ҳозирги вазиятда бу ҳарбий жиноят сифатида баҳоланиши мумкинлиги ҳақида огоҳлантирмоқда.
Нетаньяху ўтган ҳафта Оқ уйда сўзлаган нутқида, Исроил фаластинликларни қабул қилишга тайёр бўлган давлатларни излаш масаласида “АҚШ билан яқиндан ҳамкорлик қилаётгани”ни айтди. Шунингдек, у бир қатор давлатлар билан “музокараларнинг якуний босқичига яқинлашаётганини” қўшимча қилган ва Трампнинг ғоясини “ажойиб” деб атаган. Унинг фикрича, одамлар “танлов имкониятига эга бўлиши керак”.
Бундан аввал Исроил мудофаа вазири Исроил Кац Ғазо секторининг жанубий қисмидаги Рафаҳ харобалари ўрнида 60 кун ичида 600 минг фаластинликни жойлаштириш учун “инсонпарварлик шаҳри” барпо этишни буюргани хабар қилинганди.
18 май куни Исроил армияси “Гидеон аравалари” номли кенг кўламли қуруқлик операцияси доирасида анклавнинг шимолий ва жанубий ҳудудларида жанговар ҳаракатлар бошланганини эълон қилди. Унда бешта дивизия иштирок этмоқда.
Май ойи бошида Исроил Ғазо сектори аҳолисини минтақа ташқарисига чиқариш мақсадида “Гидеон аравалари” махсус операция ўтказиши ма`лум қилинганди. Операция доирасида анклав жанубида ягона гуманитар ҳудуд ташкил этилиши режалаштирилган бўлиб, у ерда 2 миллионга яқин тинч аҳоли жойлаштирилиши кўзда тутилган.
Изоҳ (0)