Хитойнинг Air China миллий авиаташувчиси халқаро миқёсдаги иштирокини кенгайтириб, Пекин—Тошкент—Пекин йўналиши бўйича мунтазам рейслари йўлга қўйди. Бу ҳақда Uzbekistan Airports хабар берди.
Таъкидланишича, авиакомпания ушбу мунтазам рейсларни очиш орқали илк бор Ўзбекистон бозорига кирмоқда.
Маълум қилинишича, 19 июль куни соат 19:40 да Тошкент халқаро аэропортига авиакомпаниянинг биринчи рейси келиб қўнган. Замонавий Boeing-737 лайнерида етиб келган экипаж ва йўловчилар анъанавий сув аркаси ва гуллар билан кутиб олинган.
“Биз Хитой ва Ўзбекистон пойтахтлари ўртасида тўғридан-тўғри рейсларни йўлга қўйишдан мамнунмиз. Ишончимиз комилки, бу йўналиш савдо, сайёҳлик ва маданий алоқаларни ривожлантиришда муҳим бўғинга айланади.
Air China нафақат йўловчиларни ташиш, балки одамларни, шаҳарларни ва имкониятларни боғловчи янги уфқларни очишга интилади. Биз авиакомпания парвозларнинг ҳар бир босқичида ишончлилик, қулайлик ва юқори хизмат кўрсатишга эътибор қаратамиз”, дея таъкидлади компания вакили.
Қайд этилишича, парвозлар ҳафтасига уч марта: сешанба, пайшанба ва шанба кунлари амалга оширилади.
Air China — Хитойнинг энг йирик ва асосий авиаташувчиси. Star Alliance аъзоси ҳисобланадиган компания 1988 йилда ташкил этилган ва Пекин аэропортида жойлашган.
Бундан аввал 2026 йил март ойидан бошлаб Etihad Аirways авиакомпанияси Абу-Дабидан Тошкентга ҳамда Марказий Осиё ва Кавказорти шаҳарларига парвозларни йўлга қўйиши хабар қилинганди.
Изоҳ (0)