Мадриднинг “Реал” клуби 2024/25 йилги мавсум якунлари бўйича молиявий ҳисоботини эълон қилди. Унда қайд этилишича, клубнинг соф фойда кўрсаткичи 56 фоизга ошган. “Қаймоқранглилар” ушбу йилни 24 миллион евро соф фойда билан якунлади. Бу натижа ўтган йилгига нисбатан 9 миллион еврога кўпроқдир.
Трансферлар ҳисобга олинмаганда, умумий даромад миқдори 1,185 миллиард еврони ташкил этди. Бу кўрсаткич футбол тарихидаги рекорд натижа ҳисобланади — илгари ҳеч қайси клуб бир мавсум ичида бу даражада даромад қилмаган.
“Реал Мадрид”нинг EBITDA (фоизлар, солиқлар ва амортизациядан ташқари фойда) кўрсаткичи 242,9 миллион еврога етиб, клуб тарихидаги энг яхши натижа қайд этилган.
Шунингдек, ҳисоботда “Реал”нинг ўз капитали 598 миллион еврога етгани ва қарз коэффициэнти 0 экани таъкидланган. Бу клубнинг молиявий мустақиллиги ва ҳар қандай тўловга лаёқатлилигидан далолат беради.
Шу билан бирга, стадион реконструкцияси учун олинган кредитлардан ташқари соф қарз миқдори атиги 12 миллион еврони ташкил қилмоқда. Стадион янгиланишига ажратилган кредитларнинг ҳали тўланмаган қисми эса 1,132 миллиард еврога тенг.
Изоҳ (0)