Лондоннинг “Челси” клуби ёзги трансфер ойнаси вақтида кўплаб футболчиларни сотиш ҳақида ўйламоқда. Бу ҳақда The Athletic нашри хабар бермоқда.
Манбага кўра, “кўклар”нинг асосий жамоаси АҚШда бўлиб ўтган Клублар ўртасидаги Жаҳон чемпионатида иштирок этаётган бир пайтда, сотувга қўйилган футболчилар клубнинг базасида машғулотларни бошлади. Улар орасида қуйидаги футболчилар бор: Жоау Феликс, Бенжамин Чилуэлл, Аксел Дисаси, Лесли Угочукву, Ренату Вейга, Армандо Броя, Алфи Гилкрист.
Маълум қилинишича, “Челси” бу футболчиларни ижарага эмас, тўлиқ трансфер асосида қўйиб юборишни мақсад қилган.
Шунингдек, клуб раҳбарияти ҳужумчилар Раҳим Стерлинг ва Кристофер Нкунку ҳам сотиб юборишни истамоқда. Нкункуга Германиянинг “Бавария” клуби жиддий қизиқиш билдирмоқда. Агар томонлар келишувга эриша олса, франциялик футболчи фаолиятини Бундеслигада давом эттиради.
“Боруссия Д” Карни Чуквуэмекани яна ижарага олмоқчи, аммо “Челси” бу футболчини ҳам тўлиқ сотишни истамоқда. Шу билан бирга, клубнинг асосий ҳужумчиси бўлиб турган Николас Жексон ҳам энди “сотилмайдиганлар” рўйхатида эмас. Унга жиддий таклиф тушса, клуб унинг трансфери ҳам амалга оширишга ҳаракат қилиб кўради.
“Челси” яна бир ёш ҳимоячи — Ише Сэмюэлс-Смитни 8 миллион фунт стерлинг эвазига сотмоқчи. Клуб бу борада Франциянинг “Страсбург” жамоаси билан музокаралар олиб бормоқда. Шунингдек, “Страсбург”га ижарага берилиши мумкин бўлган футболчилар қаторида ярим ҳимоячи Кендри Паес, ҳимоячи Аарон Анселмино ва дарвозабон Майк Пендерс ҳам бор. Улар 2025/2026 йилги мавсумни Франция клуби сафида ўтказиши мумкин.
Изоҳ (0)