Президент фармони билан АОКА фаолияти тугатилганди. Унинг ахборот соҳасида назорат ва мониторинг бўйича вазифа ва функциялари “Ўзкомназорат”га ўтказилди.
Ўзбекистон Республикаси Ахборотлаштириш ва телекоммуникациялар соҳасида назорат инспекцияси (“Ўзкомназорат”) айни пайтда Рақамли технологиялар вазирлиги ҳузурида бўлиб, алоқа, ахборотлаштириш ва телекоммуникация технологиялари, даврий босма нашрларни тарқатиш ва муаллифлик ҳуқуқлари соҳасида фонограммалар, аудиовизуал асарлар, электрон ҳисоблаш машиналари учун дастурлар тарқатилишида қонун ҳужжатларига риоя қилиниши юзасидан назоратни амалга оширувчи махсус мақомга эга орган ҳисобланади.
14 июлда имзоланган “Давлат бошқаруви тизимида самарадорлик, проактивлик ва натижадорликни ошириш чора-тадбирлари тўғрисида”ги президент фармонига кўра, Оммавий коммуникациялар масалалари бўйича марказ администрация бўйсунувига ўтказилди. 2004 йилда Алоқа ва ахборотлаштириш агентлиги қошида ташкил этилган ушбу марказ бунга қадар АОКА таркибий тузилмасида эди.
Фармон билан Вазирлар Маҳкамаси ҳузуридаги Маданият ва санъатни ривожлантириш жамғармаси ҳам администрация бўйсунувига ўтказилди. администрация матбуот хизмати медиа-маркази негизида Оммавий ахборот воситалари учун контент тайёрлаш маркази ташкил этилди.
Шунингдек, Давлат хизматини ривожлантириш агентлиги негизида Бошқарув самарадорлиги агентлиги ташкил этилди. Наркотикларни назорат қилиш миллий маркази негизида Наркотиклар ва ўқотар қуролларни назорат қилиш агентлиги ташкил этилди.
2025 йил 1 сентябргача қуйидагиларга қаратилган норматив-ҳуқуқий ҳужжатлар лойиҳалари ишлаб чиқилади:
- бюрократик тўсиқларни бартараф этиш, такрорланувчи назорат функцияларини бекор қилиш, қарор қабул қилишда шаффофлик ва очиқликни таъминлашга қаратилган республика ва маҳаллий ижро этувчи ҳокимият органлари фаолияти самарадорлигини ошириш;
- ҳудудларни комплекс ривожлантириш, аҳоли бандлигини таъминлаш ва даромадларини ошириш борасида маҳаллий ҳокимликлар иқтисодий, маъмурий ва молиявий ваколатларини янада кенгайтириш.
Президент фармони билан матбуот котиблари институти янада мустаҳкамланади.
Изоҳ (0)