Тошкентда машина капотини “аквариум”га айлантирган фуқаро 1 миллион 125 минг сўм жаримага тортилди.
Фуқаро автомобиль капотига ҳимоя плёнкасини ёпиштиргани ҳамда унинг ичига сув тўлдириб, балиқларни солгани акс этган видео тарқалиб, ижтимоий тармоқ фойдаланувчилари орасида эътирозларга сабаб бўлганди.
Экология, атроф-муҳитни муҳофаза қилиш ва иқлим ўзгариши вазирлиги матбуот хизмати ушбу ҳуқуқбузарлик Тошкент шаҳрида фуқаро И.Н. томонидан содир этилганини маълум қилди. Унга Маъмурий жавобгарлик тўғрисидаги кодекснинг 111-моддаси 1-қисми (ҳайвонларга нисбатан шафқатсиз муносабатда бўлиш) билан маъмурий баённома расмийлаштирилган ва БҲМнинг 3 баравари — 1 миллион 125 минг сўм миқдорида жарима белгиланган.
Кодексда ҳайвонларга нисбатан шафқатсиз муносабатда бўлиш, яъни уларни ғаразли ёки бошқа паст ниятларда қийноққа солиш ёки уларга азоб бериш БҲМнинг 3 бараваридан 5 бараваригача миқдорда жарима солишга сабаб бўлиши белгиланган.
Тренд учун автомобиль капотида рақсга тушганлар ҳам жавобгарликка тортилди. Тошкент шаҳри ва вилоятида бундай ҳаракатларни содир этганларга маъмурий баённомалар расмийлаштирилди.
Изоҳ (0)