ИШИД афғон бўлимининг кучи Марказий Осиёдан келган диаспораларнинг қўллаб-қувватлаши туфайли ортиб бормоқда, гуруҳ Афғонистондан ташқарида ҳам ҳужумлар уюштиришга қодир. Бу ҳақда БМТ аксилтеррор бошқармаси раҳбари Владимир Воронков маълум қилди.
БМТ Хавфсизлик Кенгашида сўзга чиққан Воронков ИШИДнинг Африкада фаоллиги кучайганини қайд этиб, афғон ИШИД—Хуросон гуруҳи Европа учун террорчилик таҳдидига айланганини ва ҳозирда ўз кучларини ёллаш ва имкониятларини ошириш бўйича саъй-ҳаракатларини кучайтираётганини таъкидлаган.
Унинг сўзларига кўра, гуруҳ сўнгги олти ой давомида, жумладан, Афғонистон ва Марказий Осиё диаспораларининг қўллаб-қувватлаши орқали молиявий ҳамда логистика имкониятларини яхшилаган. Шу муносабат билан Воронков БМТга аъзо барча давлатларни бирлашишга ва Афғонистон яна террорчилик базасига айланишининг олдини олишга чақирган.
“Бироқ Афғонистон бу каби хавотирларни рад этиб, мамлакатда ИШИД бостирилгани ва бирорта ҳам қуролли гуруҳ йўқлигини қайд этди”, дея таъкидлайди Ariana News нашри.
Афғонистон Ислом Амирлиги вакили Забиҳуллоҳ Мужоҳиднинг айтишича, амирлик расмийлари ИШИДга қарши курашган, эндиликда минтақа давлатлари ҳам бунга ҳисса қўшиши керак.
Изоҳ (0)