Аҳолининг эпидемиологик барқарорлигини таъминлаш мақсадида Европа ва қўшни давлатларда қайд этилаётган юқумли касалликларнинг Ўзбекистон ҳудудига кириб келиши ва тарқалиш хавфини олдини олиш бўйича профилактик тадбирлар янада такомиллаштирилди. Бу ҳақда Санитария-эпидемиологик осойишталик ва жамоат саломатлиги қўмитаси хабар берди.
Қайд этилишича, 2023 йилда болаларни юқумли касалликларга қарши эмлаш учун 205 миллиард сўм маблағ ажратилган. Бу маблағлар 2017 йилда ажратилган маблағларга нисбатан 10 бараварга ортган ва болаларни 13 хил касалликларга қарши эмлаш қамрови 95 фоиздан юқори кўрсаткичга чиққан.
Шунингдек, таъкидланишича, Ўзбекистоннинг Жаҳон савдо ташкилотига қўшилиши мақсадида озиқ-овқат хавфсизлиги бўйича меъёрий ҳужжатлар ишлаб чиқилмоқда.
Экспортни қўллаб-қувватлаш мақсадида йил давомида озиқ-овқат ва қишлоқ хўжалиги маҳсулотлари экспорти билан шуғулланадиган 1788 та экспортёр корхоналар рўйхати шакллантирилган. Уларга 1452 нафар қўмита ходимлари бириктирилиб, экспортёр корхоналарда мониторинг ўтказилди, уларнинг муаммолари ўрганилган ҳамда экспорт қилиш учун кўмаклашиш ишлари амалга оширилган.
Эслатиб ўтамиз, 2023 йилнинг ноябрь ойида UNICEF ва Вакцина альянси Gavi Ўзбекистон Соғлиқни сақлаш вазирлигига 3,2 миллион доллардан ортиқ қийматга эга беғараз ёрдам кўрсатилишини эълон қилганди.
Изоҳ (0)