Фарғонада банкдан қарздор фуқаронинг 3 та Nexia’си хатланди

Фарғона вилояти Марғилон шаҳрида бир кунда қарздорнинг 3 та Nexia-3 автомашиналари хатланди. Бу ҳақда Мажбурий ижро бюроси «Дарё»га маълум қилди.

Қайд этилишича, МИБнинг Марғилон шаҳар бўлими томонидан Марғилон туманлараро иқтисодий судининг қарорига асосан қарздор О.К. автотранс МЧЖдан ундирувчи «Ҳамкорбанк» фойдасига 127 миллион 480 минг сўм кредит қарзни ундириш ҳақидаги ижро ҳужжати бўйича қарздор огоҳлантирилган. Шунга қарамай, у банк олдидаги қарзини тўламай келган.

Давлат ижрочиси томонидан олиб борилган мажбурий ижро ҳаракатлари давомида 5 октябрь куни қарздорга тегишли бўлган гаровдаги 3 та Nexia-3 автотранспорт воситалари хатланиб, жарима майдонига жойлаштирилган.

Ҳозирда хатланган мулкларни аукцион савдоларга қўйиш чоралари кўрилмоқда.