Ўзбекистонда Олий таълим муассасаларига кириш имтиҳонлари бошланди. «Дарё» мухбирлари имтиҳон бўлиб ўтаётган ҳудудларда бўлиб, жараённи фото ва видеотасвирга олди.
Фарғона
«Дарё»нинг Фарғона вилоятидаги мухбири Азизжон Эрматовнинг маълумот беришича, бугун вилоятнинг 3 та ҳудудида ОТМларга кириш учун тест синовларига старт берилган.
Фарғона вилоятининг Фарғона, Марғилон шаҳарлари ҳамда Сўх туманида жойлашган стадионларда тест синовлари бошланган.
Давлат тест маркази Фарғона вилояти бўлими бошлиғи Исмоил Шокировнинг маълум қилишича, бу йил вилоятда 102 минг 400 нафардан ортиқ абитуриентлар тест синовларида қатнашиши кутилмоқда.
Имтиҳонга келган ҳар бир абитуриентга ручка, салқин ичимлик ва бош кийими (кепка) берилмоқда. Шунингдек, имтиҳон жараёнида шаффофлик ва ошкораликни таъминлаш мақсадида тест синовлари ўтказиладиган ҳудудларда видеокузатув ҳамда жамоатчилик назорати ташкил этилган.
Наманган
Наманганда ҳам тест синовлари учта манзил — «Баркамол авлод» спорт мажмуаси, «Динамо» ва «Навбаҳор-Умид» ўйингоҳларида бўлиб ўтмоқда.
Нашрнинг вилоятдаги мухбири Азизбек Абдувалиевнинг маълумот беришича, имтиҳон бўлиб ўтаётган манзилларда вилоят ИИБ Йўл ҳаракати хавфсизлиги бошқармаси ходимлари томонидан имтиҳонлар ўтказиладиган пайт автомомобиллар ҳаракати вақтинчалик чекланиши олдиндан эълон қилинган.
«Тонгги соат 06:00 дан бошлаб абитуриентлар тест синовлари ўтказиладиган жойларга бирин-кетин кела бошлади. Уларни Миллий гвардия ва ички ишлар ходимлари қарши олиб, ҳужжатларини текшириб, барчаси тўғри эканига ишонч ҳосил қилгандан сўнг ичкарига кирита бошлади. Бу ерда Давлат тест маркази вилоят вакиллиги мутасаддилари имтиҳонлар ва уларни топшириш тартиби ҳақида тушунча бергач, тест синовлари бошланди», — дейди жараённи назорат қилиб турган вакиллардан бири.
Наманганда жорий йил олий ўқув юртларига жами 77 мингдан ошиқ абитуриент ҳужжат топширган.
Андижон
Андижон вилояти ҳокими Шуҳрат Абдураҳмонов тест бошланишидан аввал имтиҳон ўтказилаётган жойга келиб, барча абитуриентларга омад тилади, дея хабар берди «Дарё» мухбири Умиджон Мамарасулов.
Андижон шаҳридаги спортнинг ўйин турлари ва енгил атлетикага ихтисослаштирилган болалар-ўсмирлар спорт мактабининг асосий ўйингоҳида ўтказилган тест синовларининг биринчи сменасида 2597 нафар абитурент иштирок этган.
Дават тест маркази Андижон вилоят бўлими бошлиғи Низомиддин Тоштемировнинг маълум қилишича, тест синовлари 8 августдан 20 августга қадар ўтказилиши белгиланган бўлиб, жараёнда 69 минг 895 нафар абитуриент иштироки кутилмоқда.
Дастлабки куннинг биринчи сменасида жами 2820 нафар абитурент иштирок этиши режалаштирилган бўлса-да, уларнинг 223 нафари номалум сабабларга кўра, имтиҳонга келмаган. Тест жараёнларидан четлаштирилганлар эса ҳозирча йўқ.
Бухоро
Бухорода бўлиб ўтаётган тест жараёнларининг биринчи кунида эса 195 нафар абитуриент номаълум сабабларга кўра имтиҳонга келмади, дея хабар берди «Дарё» мухбири Лайло Ҳайитова.
Бухоро шаҳрининг «Умид» теннис корти ҳамда «Дилкушо» теннис спорт мажмуасида бўлиб ўтган тест жараёнларига 195 нафар абитуриент қанташмаган.
Таъкидланишича, олий таълим муассассаларига ўқишга кириш учун тест синовларининг биринчи сменасида қатнашиши лозим бўлган 2580 нафар абитурентдан 2385 нафари қатнашган.
«Тест синовлари жараёнида икки нафар абитуриент ўзаро гаплашганлиги учун четлатилди. Тест синовларининг адолатли, холис ва шаффофлик билан ўтказилиши таъминланади. Мазкур жараёнларда абитуриентларнинг ота-оналари ўз фарзандларини кўришлари, соя-салқинда дам олишлари учун ҳам барча шароитлар яратилган. Имтиҳон жараёнларини онлайн кузатиб бориш имкони ҳам мавжуд», — деди Давлат тест маркази вилоят бўлими бош мутахассиси Иззат Раҳмонов.
Самарқанд
«Дарё»нинг Самарқанд вилоятидаги мухбири Фарҳод Норбўтаевнинг маълумот беришича, вилоятдаги имтиҳонда икки нафар абитуриент бошқа бировнинг ўринига киришга уринган.
Вилоятда бешта очиқ майдонда жами 5460 та жой ҳозирланган бўлиб, бир кунда 10920 нафар абитуриент имтиҳон топширади.
«Бугунги тест синовлари 2022—2023 йилга олий таълим муассасаларининг бакалавр йўналишига кириш тест синовлари ҳисобланади. Самарқанд вилоятида бешта жойда имтиҳонлар бўлиши белгиланган. Стадионда 45 та гуруҳга мўлжалланган жой тайёрланган. Ҳар бир гуруҳ учун алоҳида камера. Иккита онлайн эфирга узатувчи камера узлуксиз 24 соат ишлайди. Шунингдек, 360 градусга айланувчи иккита кузатув камераси ҳам ўрнатилган. Абитуриентлар кириш қисмига ҳам камералар, фейс контрол ўрнатилган. Ҳар бир абитуриент қуёшдан ҳимояланувчи кепкалар, сув ва ручкалар билан таъминланмоқда. Ҳар бир гуруҳга иккитадан кузатувчи қўйилган бўлиб, жами 90 нафар кузатувчилар бор. Бундан ташқари кириш қисмларида ҳам каузатувчилар бор», — дейди Давлат тест маркази мутахассиси Қодиржон Юсупов.
Давлат тест маркази Самарқанд вилояти бўлимининг маълум қилишича, вилоятда 108 978 нафар абитуриент олий таълим муассасаларига ўқишга кириш учун ҳужжат топширган.
Бугун имтиҳоннинг илк куни биринчи навбатда 5460 нафар абитуриент тест синовларида қатнашиши керак эди. Аммо 503 нафар абитуриент турли сабабларга кўра имтиҳонга келмаган.
Шунингдек, икки нафар абитуриент ўринга ўрин киришга урингани, бир нафари имтиҳонда тақиқланган воситадан фойдалангани сабабли тест синовларидан четлатилган. Самарқандда олий таълим муассасаларига кириш тест синовлари 10 кун, яъни 17 августга қадар давом этади.