АҚШнинг Арканзас, Иллинойс, Кентукки ва Теннеси штатлари ҳудудларида торнадо кузатилди. Табиий офат оқибатида бир нечта биноларга зарар етган, расман беш нафар одамнинг ҳалок бўлгани ҳақида ахборот берилган. Кентукки губернатори Эндрю Грем Бешир фавқулодда ҳолат оқибатида ҳалок бўлганлар сони 50 нафардан кўп бўлиши мумкинлигини маълум қилган, дея хабар берди «Коммерсантъ».
Теннесида торнадо туфайли уч киши ҳалок бўлган: Обион округида бир нафар, Лейк округида икки нафар инсон ҳаётдан кўз юмган. Шунингдек, қуюннинг хиёбон ҳудудига кириши оқибатида бир неча киши жиддий жароҳатлар олган, дея хабар берган маҳаллий «kfvs12» телеканали.
Арканзасда торнадо қариялар уйи жойлашган ҳудудни вайрон қилди ва оқибатда икки киши ҳалок бўлди, беш нафар одам турли даражадаги тан жароҳатлари олди. АP маълумотларига кўра, бинолар вайроналари остида 20 га яқин одам қолиб кетган бўлиши мумкин.
Иллинойсда Amazon компаниясининг омбори биноси вайрон бўлган ва вайроналар остида одамлар қолиб кетган бўлиши мумкин, дея хабар қилган Fox News.
Кентуккида қуюн камида 50 нафар одамни ҳалок қилгани ҳақида тахминлар мавжуд. Штат губернатори матбуот анжуманида қурбонлар сони тахмин қилинганидан кўпроқ эканлиги ҳақида гапирган.
https://www.instagram.com/p/CXV7gLDlWT9/
«Кентуккида 50 дан зиёд одам ҳалок бўлган... Катта эҳтимол билан уларнинг сони 70 нафардан 100 нафаргача бўлса керак — бу даҳшат», деган Бешир матбуот анжуманида.
Октябрь ойида АҚШ шарқига ёпирилган бўронли шамол сабаб юз минглаб уйлар электрсиз қолган, мартда АҚШда содир бўлган торнадо юзлаб уйларга зарар етказганди.