Сабзавотлардан тайёрланадиган 4 хил котлет рецепти

Сабзавотлардан тайёрланадиган котлетлар мазали бўлиши билан бирга фойдали ҳамдир.

Карамли котлет

Ушбу рецепт кўпинча парҳезда юрадиганлар учун айни муддао.

Керакли маҳсулотлар:

• гулкарам – 1 килограмм;
• пиёз – 1 дона;
• ун – 120 грамм;
• манний ёрмаси – 80 грамм;
• саримсоқ – 3-4 бўлак;
• қуритилган нон – 3-4 ош қошиқ;
• кўкат, туз ва зираворлар.

1. Гулкарам бўлакларга бўлиниб, шўр сувга солинади ва 10-15 дақиқа давомида қайнатилади.
2. Сўнгра сувдан олиниб, блендерда майдаланади. Намликни олиб ташлаш учун сиқиб олинади.
3. Пиёз ва саримсоқ майда тўғралиб, карам билан аралаштирилади.
4. Кўкатлар ҳам ювилиб, майда тўғралади. Карамли аралашма қўшилади, устидан ун ва манний ёрмаси қўшилади.
5. Аралаштирилиб, 5 дақиқага қолдирилади.
6. Тайёр бўлган массадан котлетлар ясалади ва қуритилган нонга ботирилиб, ўсимлик ёғида икки томони қизаргунга қадар қовурилади.

Картошкали котлет

Котлетларни музлаткичда ҳам сақлаш мумкин.

Керакли маҳсулотлар:

• картошка – 1 килограмм;
• ёнғоқ – 100 грамм;
• тухум – 2 дона;
• сариёғ – 2 ош қошиқ;
• ун – 2 ош қошиқ;
• ўсимлик ёғи, сметана, туз ва зираворлар.

1. Ёнғоқлар қуруқ идишда қовурилади. Картошкалар қайнатиб олинади.
2. Тухум, ёнғоқ, сариёғ, картошка ва туз солиб, пюре ҳосил қилинади.
3. Котлетлар тайёрланиб, ўсимлик ёғида 3-4 дақиқа қовурилади.

Сабзили котлет

Витаминга бой сабзили котлетлар саломатлик учун фойдали.

Керакли маҳсулотлар:

• сабзи – 4 дона;
• олма – 4 дона;
• сут – 1/2 стакан;
• тухум – 1 дона;
• манний ёрмаси – 2 ош қошиқ;
• сариёғ – 2 ош қошиқ;
• сметана, шакар, ўсимлик ёғи, қуритилган нон.

1. Сабзи ва олма тозаланиб, тўртбурчак шаклда тўғралади.  Сариёғ қуйилган идишда 5 дақиқа қовурилади ва утидан сут қуйилади. 3 дақиқа давомида қайнатилади.
2. Олма, манний ёрмаси, туз ва шакар қўшиб, 2 дақиқа давомида аралаштирилади. Қуюқлашгач, тухум қўшилади.
3. Сўнгра массадан котлетлар тайёрланади, қуритилган нонга ботирилиб, ўсимлик ёғида қовурилади.

Сабзавотли котлет

Нонушта учун ажойиб танлов.

Керакли маҳсулотлар:

• гулкарам – 1/2 килограмм;
• сабзи – 2 дона;
• пиёз – 1 дона;
• сут – 1/2 стакан;
• тухум – 2 дона;
• манний ёрмаси – 3 оҳ қошиқ;
• кўкат, туз ва зираворлар.

1. Тухум манний ёрмаси билан аралаштирилади. Сабзи қирғичдан ўтказилади, гулкарам ва пиёз майда тўғралади.
2. Дастлаб пиёз қовурилади, олтин рангга киргач сабзи қўшилади. Карам ҳам солиниб, сут, туз ва зираворлар сепилади.  10 дақиқа давомида паст оловда пиширилади.
3. Сўнгра массадан котлетлар ҳосил қилиниб, ёғда қовурилади.