Бугун,

  • USD 11095.31
  • RUB 173.84
  • EUR 10772.44

Европа Чемпионлар Лигаси ўзининг энг қизғин палласига чиқди. Пойгада фақат тўрт жамоа қолди. Улардан иккиси бугун ўзаро тўқнаш келади — Мадридда ҳақиқий титанлар жанги бўлиб ўтади.

Фото: Twitter

Фото: Twitter

Футбол оламида инқилоб қилишга уриниш барбод бўлди, Суперлига лойиҳаси бир неча кун ичида муваффақиятсизликка юз тутди. Флорентино Перес таслим бўлмаяпти ва Суперлигани ташкил қилиш ғоясидан кечмаяпти, бу орқали у УЕФАнинг асосий душманига айланди. Бироқ мадридликларни Чемпионлар Лигасидан четлатиш ҳақидаги гаплар ҳозирча фақат гаплигича қолмоқда. Бу шуни англатадики, Европанинг энг нуфузли мусобақасидаги «Реал» ва «Челси» жамоалари ўртасидаги учрашув аввалдан белгиланган вақтда бўлиб ўтади.

Мураббийлар тўқнашуви

Зинедин Зидан ва Томас Тухель қарама-қаршилиги мухлислар орасида у қадар машҳур эмас. Бироқ улар бунга қадар ўзаро тўрт бор тўқнаш келишга улгурган ва уларда Тухель франциялик ҳамкасбига ютқазмаган. Тухель қўл остидаги «Боруссия» 2016 йилда ЕЧЛ гуруҳ босқичида «Реал» билан икки бор 2:2 ҳисобини қайд этган. 2019 йилда эса «ПСЖ» бошқарувида 3:0 ҳисобидаги йирик ғалаба ва 2:2 ҳисобидаги дурангни қайд этган. Тўрт ўйинда 15 та гол (бир ўйинда ўртача 3,75) қизиқарли курашни кафолатлайди.

Қайд этиш жоиз, «Челси» Тухель қўл остидаги бирорта сафар ўйинида ҳали ютқазмади. Шунингдек, Тухель Зидан Чемпионлар Лигасида мағлуб этолмаган уч мураббийдан бири ҳисобланади.

Фото: Getty Images

Фото: Getty Images

«Реал»

B гуруҳи аввалданоқ «ўлим гуруҳи» деб аталганди. «Реал» бу гуруҳни биринчи ўринда якунлади. Аммо бу ишни жуда қийинчилик билан уддалади. Гуруҳда қолиб кетиш хавфи сўнгги турга қадар сақланиб қолди, якунда 10 очко «Боруссия М», «Шахтёр» ва «Интер»ни ортда қолдиришга етарли бўлди. 1/8 финалда Мадрид жамоаси «Аталанта»ни қийинчиликсиз таслим этди (1:0, 3:1), чорак финалда эса «Ливерпуль» (3:1, 0:0) доғда қолдирилди.

Эден Азар айнан собиқ жамоасига қарши ўйин арафасида сафга қайтди. Деярли икки йил аввал Эден Азар «Челси»ни жаҳоннинг энг ёрқин юлдузларидан бири сифатида тарк этганди. Бироқ бельгиялик футболчининг Испаниядаги ишлари юришмади. Салкам икки мавсум давомида Эден 358 кунни жароҳат билан ўтказишга мажбур бўлди. У нарх ва даража борасида «Реал» тарихидаги энг муваффақиятсиз трансфер сифатида эътироф этилмоқда.

Азарнинг сўнгги жароҳатини тиклашга 38 кун вақт кетди, ниҳоят Эден «Бетис»га қарши кечган шанба кунги ўйинда майдонга тушди ва 14 дақиқа ҳаракат қилди. Бу вақт ичида Азар самарали ҳаракатларни амалга ошира олмаган бўлса-да, муҳим ўйин олдидан ўйин амалиётига эга бўлди. Балки бельгиялик иқтидор эгаси ушбу қарама-қаршиликдан кейин собиқ жамоасида қолиб кетган жанговарлик руҳининг бир бўлагини қайтариб олар...

Фото: Twitter

Фото: Twitter

Алмаштириб бўлмас ярим ҳимоя триоси. Тони Кроос, Каземиро ва Лука Модрични муаммоларга кўмилиб ётган «Реал»ни ушлаб турган таянчларга қиёсласа бўлади. Ушбу трио нафақат ёрқин ўйини билан, балки ўринбосарлар йўқлиги учун ҳам ушбу учрашувда майдонга тушиши деярли аниқ. «Реал»нинг ўйин учун қайдномасига назар ташланса, бу уч футболчидан бошқа Иско, Аррибас ва Бланко номларини учратиш мумкин. Бироқ шуни унутмаслик лозим, Кроос кичик жароҳат сабаб мадридликларнинг сўнгги уч ўйинини ўтказиб юбориб, эндигина сафга қайтди. Бироқ Marca хабарига кўра, бу ўйинда иштирок этиш учун германиялик футболчига ҳеч нарса халал бермайди.

Бундай шароитда Федерико Вальверденинг қўшимча куч сифатида бўлиши айни муддао бўларди, бироқ уругвайлик футболчи коронавирусга чалиниб қолгани боис ушбу баҳсни ўтказиб юборади. Шунингдек, Лукас Васкес, Ферлан Менди ва Серхио Рамос ҳам «Реал»га ёрдам бера олмайди.

«Челси»

Лондонликлар «Севилья», «Ренн», «Краснодар» билан бир гуруҳдан жой олди ва осонликча плей-офф масаласини ҳал қилди. Нимчорак финалда «Челси» «Атлетико»га иккита ўйинда жавобсиз учта гол ҳолда кейинги босқичга йўл олди. Қуръа «кўклар»га яна омадли келди ва ярим финал йўлида «Порту» таслим этилди.

Ҳужумчиларга бой клуб айнан олдинги чизиқда муаммо сезмоқда. Томас Тухель жамоаси аввалига ажойиб прагматик ўйинлари билан натижалар қайд этди. Бироқ сўнгги ўйинларда бу прагматизм кичик инқирозга олиб келди. «Астон Вилла»га урилган тўртта голдан кейин барчаси яхши томонга ўзгаришига умид туғилганди, бироқ «Челси» шундан кейинги тўртта ўйинда бор-йўғи иккита гол урди. Жамоанинг «Брайтон»га қарши ўйиндаги «хГ» (кутилган голлар) кўрсаткичи 0,81 ни ташкил этган бўлса, «Вест Ҳэм» билан ўйинда 2,52 ни кўрсатди. Бу ўйинларда Лондон клуби бор-йўғи битта гол урди. Бироқ алоҳида таъкидлаш жоиз, голга Тимо Вернер муаллифлик қилди. Германиялик иқтидор эгасининг АПЛ ва «Челси»га мослашиш жараёни қийналаётгани ва узоқ давом этган қуруқ серияси — бу энди алоҳида мавзу.

Фото: Getty Images

Фото: Getty Images

Мэйсон Маунт Тухель даврида ҳам асосий ўйинчи бўлиб қолмоқда. Фрэнк Лэмпард «кўклар»ни тарк этганидан кейин мухлисларни хавотирга солаётган саноқли жиҳатлар бири Маунтнинг келажаги эди. Сабаби «Челси» тарбияланувчиси «Дерби Каунти»да ижарада юрган вақтдаёқ Лэмпард қўл остида ёрқин ўйин намойиш қилганди. Мутахассис Лондонга келгандан кейин ҳам Маунт асосий таркиб ўйинчисига айланди. Томас Тухелнинг келиши футболчининг жамоадаги ҳолатига салбий таъсир ўтказмади: Мэйсон ҳамон асосий таркибнинг ажралмас қисми бўлиб қолмоқда. У ҳали «Челси»нинг «юраги» бўлишга улгурмади, аммо бу темп билан яқин орада бу даражага етишига шубҳа йўқ.

Эҳтимолий таркиблар:

«Реал»: Тибо Куртуа, Дани Карвахаль, Эдер Милитао, Рафаэл Варан, Начо, Каземиро, Лука Модрич, Тони Кроос, Марко Асенсио, Винисиус Жуниор, Карим Бензема.

«Челси»: Эдуард Менди, Сесар Аспиликуэта, Тиаго Сильва, Антонио Рюдигер, Рис Жеймс, Бен Чилуэлл, Нголо Канте, Кристиан Пулишич, Мэйсон Маунт, Кай Ҳаверц.

Мураббийлар нима дейди?

Биз Ла Лига ва ЕЧЛдан бирини танламаймиз. Олдимизда кўплаб ўйинлар бор ва охиригача курашамиз. Бу мавсумдаги энг қийин ўйин бўлади, биз унга яхши тайёргарлик кўрдик. «Реал» ва «Челси» ярим финалда ўйнашга ҳақли.

Зинедин Зидан, «Реал» бош мураббийи

«Реал» — сўнгги 10 йилликда Чемпионлар Лигасининг асосий жамоаси. Бу биз учун ўзига хос ўйин. Биз ўзимизга бўлган ишонч билан майдонга тушамиз ва бу даражада курашишга тайёрмиз.

Томас Тухель, «Челси» бош мураббийи

Учрашув 27 апрелдан 28 апрелга ўтар кечаси 00:00 да бошланади.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!

Изоҳ
Асосий янгиликлар
Спорт
Tata Steel Чесс 2023. Нодирбек Абдусатторов америкалик рақиби билан дуранг ўйнади ва ҳамон мусобақа пешқадами бўлиб турибди. Жавоҳир Синдоровда ҳам дуранг
Маҳаллий
Сурхондарёдан топилган айиқ боласи зоопаркка топширилди
Маҳаллий
Ўзбек тили дарслигида мусиқа асбоблари номи хато ёзилгани айтилди (видео)