Бутун дунёда 101 миллиондан ортиқ одам коронавирусга қарши эмланди, дея хабар берди «Коммерсантъ». Ҳисоб-китоблар Bloomberg агентлиги томонидан 64 та мамлакат бўйлаб юритилган.
Барча мамлакатларда коронавирусга чалинганларнинг умумий сони 103,4 миллион кишини ташкил қилади. Қўшма Штатларда эмланганлар сони COVID-19 билан касалланганлар сонидан ошиб кетган.
Мамлакатлар бўйлаб ўртача эмлаш даражаси кунига 4,25 миллион дозани ташкил қилмоқда.
Эмланганлар сони бўйича етакчи давлатлар:
- АҚШ — 32,8 миллион;
- Хитой —24 миллион;
- Европа Иттифоқи — 12,7 миллион;
- Буюк Британия — 9,8 миллион;
- Исроил — 5 миллион.
Қўшма Штатларда 32,8 миллион киши камида бир дозадан вакцина олган, ўртача эмлаш даражаси бир кунда 1,3 миллионни ташкил қилади. Жонс Ҳопкинс университети маълумотларига кўра, Қўшма Штатларда 26,3 миллион кишида коронавирус қайд этилган.
Коронавирусга чалинганлар сонининг кўплиги бўйича АҚШ етакчи бўлиб қолмоқда. Ундан кейин Ҳиндистон — 10,8 миллион; Бразилия —9,2 миллион; Буюк Британия —3,9 миллион ва Россия —3,8 миллион.
Аввалроқ АҚШ президенти Жо Байден Қўшма Штатлардаги коронавирусга қарши эмлаш дастури кутилгандек натижани бермаганини маълум қилганди. Шу муносабат билан АҚШ яқин келажакда Moderna ва Pfizer компанияларидан яна 100 миллион дозадан вакцина сотиб олиши кутилмоқда.
Италия эса коронавирусга қарши вакцина танқислигига дуч келган.