Нидерландия терма жамоаси ва «Ливерпуль»нинг ҳимоя қўрғони Виржил ван Дейкнинг қандай ҳаёт кечириши ҳақида ҳикоя қиламиз.
Уйлари
Дастлаб, ван Дейк Ливерпуль шаҳри яқинидаги Чешир графлигида жойлашган уйни ижарага олганди. Эътиборлиси, мазкур «Манчестер Юнайтед»нинг амалдаги устози Оле-Гуннар Сульшерга тегишли. Нидерландиялик шахсий ҳаёти ва мулкларини кўз-кўз қилишни хушламаслиги сабаб 4 миллион евролик ушбу уйнинг фотосуратлари деярли йўқ.
Шунингдек, ван Дейк Ливерпулнинг энг обрўли туманларидан бирида шахсий уйига эгалик қилади. Мазкур уйнинг нархи 2,5 миллион еврога баҳоланган. Унда 5 та ётоқхона, оилавий кинотеатр, спорт зали ва чўмилиш ҳавзаси мавжуд.
Машинаси
Футбол мухлислари биладики, чарм тўп усталари одатда машиналарга муккасидан кетган бўлади. Бироқ бугунги куннинг энг яхши ҳимоячиларидан бири бўлган ван Дейк ҳақида бу гапларни айтиш жуда мушкул, боиси унинг гаражида фақат битта машина бор — Mercedes-Benz AMG G63 (200 минг доллар). Айтишларича, Виржил ушбу автомобилга алоҳида меҳр қўйган ва уни ҳар йили янгилаб туради.
Шахсий ҳаёти
«Ливерпуль» ҳимоячисини ҳам жамоа ҳужумчиси Муҳаммад Салоҳ каби аёллар борасида анча барқарор дейиш мумкин. Ван Дейк болалигида кўнгил қўйган Рике Ноитгедагт исмли қизга уйланган. Рике кийим-кечак савдоси билан шуғулланади. Бироқ у айнан Виржил туфайли севимли ишидан воз кечиб, у билан Англияга йўл олган. 2014 йилда қиз фарзандли бўлган жуфтлик 2016 йилга келиб ўз муносабатларини расмийлаштиради.
Дўстлари
Виржил камтарин ва киришимли йигит бўлгани учун борган жойларидаги инсонлар билан тезда тил топишиб кетади. Унинг дўстлари қаторида эса Жо Гомес, Жоржиньо Вейналдум ва Алиссонни келтириш мумкин. Уларнинг дўстлиги майдонга ҳам кўчиб, жамоанинг натижаларига ижобий таъсир ўтказган.
Футболдан ташқари қизишлар
Ван Дейк ўйин ва машғулотлардан бўш бўлганида асосан оиласи билан бирга вақт ўтказади. Шунингдек, у интервьюларидан бирида фильм томоша қилишни ва Лондон бўйлаб саёҳат қилишни ёқтиришини айтганди.