«Яхши инсон бўлиш, буюк футболчи бўлишдан кўра муҳимроқ», – деганди Лионель Месси. Лео эса бир вақтнинг ўзида ҳар иккаласини ҳам бирдек бекам-кўст бажариб келмоқда. Аргентиналикнинг индивидуал маҳорати ва ютуқлари ҳақида ортиқча гапиришнинг ҳожати йўқ. Чунки буни ҳамма ҳеч бўлмаганда телевизор орқали кўрган, роҳатланган ва лол қолган. Шундай экан, қуйида унинг ҳамма ҳам илғайвермайдиган хайрли ишлари ҳақида фикр юритамиз.
Лионель ҳеч қачон одамларга, айниқса, болаларга ўз ёрдамини аямайди, чунки бир вақтлар унинг ўзи ҳам қийинчиликларга дуч келган. Лео болалигида ўсиш гормони етишмаслигидан азият чекиб, катта муаммоларга дуч келганлигини ҳақида эшитмаган мухлислар камчиликни ташкил қилса керак. Агар ўшанда «Барселона» томонидан молиявий ёрдам кўрсатилмаганида, эҳтимол, футбол бу каби даҳони кўрмаган бўларди.
Ўзгаларга ёрдам беришни хоҳлаган Месси 2007 йилдаёқ бемор ва камбағал болаларни ўқитиш ва уларга ғамхўрлик қилиш учун хайрия фондини ташкил этганди. Аргентинадаги фаол ишларидан ташқари ушбу фонд Мексикадаги болалар учун таълим дастурига ҳамда уруш ҳаракатларидан азият чеккан минглаб суриялик болаларни даволаш учун 100 мингдан евродан ортиқ маблағ ажратган. Бундан ташқари Лионелнинг шахсан ўзи ҳам узоқ вақт давомида болаларга ёрдам кўрсатиб келади ва шу туфайли 2010 йилдан бери ЮНИСЕФнинг элчиси ҳисобланади. Аргентиналик имкон қадар ушбу ташкилотнинг барча лойиҳаларида фаол қатнашишга ҳаракат қилади.
«Мен ҳар бир боланинг таълим олишига қаратилган тарғиботни қўллаб-қувватлайман. Чунки ҳар бир бола ўз имкониятларини ва орзуларини амалга оширишга ҳақли деб биламан», – дейди Месси.
Шунингдек, Лео ўз маблағларини турли тиббиёт муассасаларининг қурилишларига ҳам сарфлашни канда қилмайди. 2013 йилда форвард ўзи туғилган Росарио шаҳридаги касалхонани реконструкция қилиш учун 600 минг евро ажратади. Тиббиёт муассасасида онкология маркази ва болалар хонаси модернизация қилинади, маҳаллий шифокорлар эса малака ошириш учун Испанияга жўнатилади. Худди шу йилнинг ўзида Лео Росариодаги спорт марказини таъмирлаш учун ҳам 150 минг евро хайрия қилади. Бир йил ўтиб футболчи Буэнос-Айресда саратон маркази қурилиши учун 140 минг маблағ ажратади. 2018 йилда эса футболчининг жамғармаси Барселонадаги болалар саратон маркази қурилишига нақ 1,5 миллион евро хайрия қилади. Форварднинг шахсан ўзи бинонинг (рамзий) биринчи ғиштини қўйиш маросимида иштирок этган.
2013 йилда эса Япониянинг заргарлик буюмларини ишлаб чиқарадиган Гинза Танака компанияси Мессининг оёғидан нусха кўчириб, унга олтин қуяди. 25 килограммли асосий ҳайкал билан биргаликда яна 100 та кичик фигура ва ҳужумчининг оёқ изи туширилган 50 та олтин плита сотувга қўйилди.
Буларнинг барчаси 5 миллион долларга сотилади, тўпланган пулларнинг барчаси Япониядаги зилзиладан жабрланганларга ёрдам бериш учун йўналтирилади.
2015 йилда Месси ўз тасвири туширилган иккита расмни жами 1 миллион долларга сотди ва бу пулларни Индонезия, Непал ва Бангладешдаги болалар таълимига бериб юборди.
Кўриниб турибдики, Лео юз минглаб одамларга ёрдам берган ва бу ишни қилишда давом этмоқда. Аммо эътиборингизни 2012 йилда содир бўлган воқеага қаратмоқчимиз. Бир аёл Леонинг отаси билан боғланиб, унга ўғли, 12 ёшли марокашлик футболчи ҳақида ҳикоя қилиб беради. Валид Кашаш исмли болакайда Мессида бўлгани каби ўсиш гормони етишмовчилиги кузатилганди.
Аргентиналик даҳо эса ёш мухлисининг муаммосини эътиборсиз қолдиролмади ва унинг даволаниши учун пул тўлай бошлади. Ўша пайтдан бошлаб, бола 18 ёшга тўлгунигача ҳар 15 кунда «Барселона» форварди унинг даволаниши учун 200 евродан ўтказиб туради. Месси Валидга доимо кучли бўлишини ва ҳеч қачон таслим бўлмаслигини айтиб, хатлар юбориб туради.
Лионель – ажойиб ва камтар инсон. У ҳам майдонда, ҳам унинг ташқарисида кўпчиликка намуна бўла олади. Шунинг билан бирга у ҳеч қачон мухлисларига автограф беришни ва суратга тушишни рад этмайди. Ўйлаймизки, юқорида келтирилган маълумотлар Месси ҳақидаги фикрларингизни янада ижобий томонга ўзгартиради, албатта.
Изоҳ (0)