Туркия президенти Ражаб Тоййиб Эрдўғон АҚШда бўлиб ўтган президентлик сайловидан бир ҳафта ўтгач Жо Байденни ғалаба билан табриклади. Бу ҳақда «РБК» хабар берди.
«Умид қиламанки, сайлов натижалари Қўшма Штатларнинг дўстона ва иттифоқдош халқи фойдасига хизмат қилади», — дея маълум қилган Эрдўғон.
Туркия президенти Анқара ва Вашингтон ўртасидаги муносабатларнинг «стратегик характерини» қайд этган ҳамда мамлакатлар глобал ва минтақавий даражада дуч келган муаммолар шароитида уларнинг ривожи зарур эканлигини кўрсатиб ўтган. «Мен бу йўналишда АҚШ маъмурияти билан яқиндан ҳамкорлик қилиш бўйича қатъийлигимизни тасдиқлайман», — дея таъкидлаган Эрдўғон.
Аввалроқ БМТ бош котиби Жо Байденни АҚШ президентлиги сайловидаги ғалаба билан табриклаганди.