Футбол бўйича УЕФА Миллатлар Лигасининг 2-туридан ўрин олган сўнгги баҳслар 8 сентябрь, сешанба куни бўлиб ўтди.
Португалия терма жамоаси Швеция майдонида меҳмон бўлди. Биринчи бўлим якунланиши арафасида шведлар бир ўйинчи кам бўлиб қолди: Густав Свенссон иккинчи сариқ карточкасини олиб майдонни тарк этди. 45-дақиқада Криштиану Роналду жарима зарбасини қойилмақом ижро этган ҳолда меҳмонларни олдинга олиб чиқди.
Иккинчи бўлимда ҳам португаллар вазиятни назорат қилди. 72-дақиқада Роналду яна бир чиройлига голга муаллиф бўлди. Қолган вақтда ҳисоб ўзгармади.
Гуруҳнинг иккинчи учрашувида Франция терма жамоаси Хорватия билан ўйнади. Дастлаб хорватлар Деян Ловреннинг голидан кейин олдинга ўтиб олди. Бунга майдон эгалари 43-дақиқада Антуан Гризманнинг голи билан жавоб қайтарди. Биринчи бўлим якунланиши арафасида Антони Марсьялнинг зарбасидан кейин тўп Хорватия посбонига тегган ҳолда дарвозадан жой олди.
Иккинчи бўлим дебютида Йосип Брекало ҳисобни тенглаштирди. Бироқ орадан кўп ўтмай Даёт Упамекано Франциянинг учинчи голини урган бўлса, 77-дақиқада Оливье Жиру пенальтини аниқ ижро этган ҳолда якуний ҳисобни ўрнатди — 4:2.
Шу тариқа А Лига 3-гуруҳида Португалия ва Франция терма жамоалари 6 очко билан қўшҳокимлик қилмоқда. Хорватия ва Швеция ҳали очко тўплай олмади.
Миллатлар Лигаси
2-тур баҳслари
8 сентябрь, сешанба
Франция — Хорватия 4:2
Голлар: 0:1 – 16 Ловрен, 1:1 – 43 Гризманн, 2:1 – 45, автогол Ливакович, 2:2 – 55 Брекало, 3:2 – 65 Упамекано, 4:2 – 77, пенальти Жиру.Франция: Льорис, Люка Эрнандес, Лангле, Упамекано, Менди, Сиссоко, Канте (Камавинга, 63), Нзонзи, Гризманн (Фекир, 78), Бен-Йеддер (Жиру, 63), Марсьяль.
Хорватия: Ливакович, Ловрен, Чалета-Цар, Мелняк, Уремович (Вида, 57), Брозович, Ковачич, Влашич, Перишич (Пашалич, 66), Крамарич, Ребич (Брекало, 46).
Огоҳлантиришлар: Чалета-Цар (34), Лангле (38), Канте (59), Нзонзи (68), Ловрен (76), Брозович (76).
Швеция — Португалия 0:2
Голлар: 0:1 – 45 Роналду, 0:2 – 72 Роналду.Швеция: Ольсен, Хеландер, Янссон, Аугустинссон, Крафт, Свенссон, Форсберг (Сванберг, 79), Олссон, Кулусевски (Экдал, 90), Исак (Квайсон, 71), Берг.
Португалия: Антони Лопеш, Пепе, Рубен Диаш, Жоау Канселу, Геррейру, Бруну Фернандеш, Моутинью (Рубен Невеш, 73), Бернарду Сильва (Гедеш, 22), Данилу Перейра, Жоау Феликс, Роналду (Диогу Жота, 81).
Огоҳлантиришлар: Свенссон (14), Геррейру (56), Жоау Феликс (86).
Четлатиш: Свенссон (44).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)