АПЛ. «Манчестер Юнайтед» яна мағлуб бўлди, «Лестер» ва «Тоттенҳэм»да эса ғалаба (видео)

Футбол бўйича Англия Премьер лигасининг 24-тури доирасида 22 январь, чоршанба куни 3 та ўйин якунланди.

Брендан Рожерс бошқарувидаги «Лестер» клуби ўз майдонида «Вест Ҳэм»ни синовдан ўтказди.

Учрашув давомида «тулкилар» вакиллари Харви Барнс (24), Рикарду Перейра (45) ҳамда Айосе Перес (81—пенальти, 88) рақиб дарвозасига гол урган бўлса, лондонликларнинг голига Марк Нобл (50—пенальти) муаллифлик қилди.

Шу тариқа «Лестер» жамоаси ўз уйида кечган баҳсда «Вест Ҳэм»ни йирик 4:1 ҳисобида мағлуб этди ва 3 очкони қўлга киритди.

Мазкур ғалабадан сўнг мусобақа жадвалида 3-ўринда бораётган «Лестер» очколари сонини 48 тага етказиб олди. «Вест Ҳэм» эса 23 очко билан 17-ўринни эгаллаб турибди.

Жозе Моуриньо бошлиқ Лондоннинг «Тоттенҳэм» клуби эса «Норвич»га қарши майдонга тушди.

Тўқнашувнинг 38-дақиқасида «шпорлар» ярим ҳимоячиси Деле Алли ҳисобни очган бўлса, 70-дақиқага келиб «канарейкалар» ҳужумчиси Теему Пукки пенальтидан Уго Льорис дарвозасини аниқ нишонга олди. орадан 9 дақиқа ўтиб эса кореялик Сон Ҳён Мин Лондон клубининг ғалаба голига муаллифлик қилди (2:1).

Таъкидлаш жоиз, ушбу ғалабадан кейин «Тоттенҳэм»нинг очкоси 34 тага етди ва жамоа мусобақа жадвалида 6-ўринга кўтарилиб олди. «Норвич» эса 17 очко жамғариб сўнгги ўринни банд қилди.

Шу куни Оле-Гуннар Сульшер қўл остидаги «Манчестер Юнайтед» «Стемфорд Бриж»да «Бёрнли»ни қабул қилди.

Беллашувда меҳмон жамоа аъзолари Крис Вуд (39) ва Жей Родригес (56) Давид Де Хеа қўриқлаётган дарвозага гол урди.

Натижада «Юнайтед» ўз майдонида кечган ўйинда «Бёрнли»га ютқазиб қўйди ва очко йўқотди.

Маълумот учун, «қизил иблислар» 34 очко йиғиб, Премьер лигада 5-ўринда бормоқда. «Бёрнли» эса 30 очко тўплаган ҳолда 13-поғонадан жой олди.