Машҳур француз актёри Жерар Депардье Ўзбекистоннинг Франциядаги туризм элчиси этиб тайинланди. Бу ҳақда Бош вазир ўринбосари Азиз Абдуҳакимов журналист ва блогерлар билан учрашувда маълум қилди, деб хабар берди «Холис фикр» Telegram канали.
Ташаббус Жерар Депардьенинг ўзидан чиққан. У Ўзбекистоннинг туризм тарғиботини Франциядан ташқари Европа давлатларида ҳам олиб бориш ниятида экан, дейилади хабарда.
Айни пайтда Ўзбекистоннинг ўн тўртта туризм элчиси фаолият юритяпти. Шундан олти нафари шу кунларда Ўзбекистонда бўлиб турибди. Улар «Ипак йўлида туризм» йигирма бешинчи сайёҳлик кўргазмаси очилишида қатнашиши кутилмоқда.
Қайд этилишича, ҳозир Жерар Депардье Ўзбекистон ҳақидаги 52 дақиқалик фильмининг Самарқанддаги суратга олиш ишлари билан банд.
Аввалроқ Жерар Депардьенинг Ўзбекистонга келгани ҳамда Ислом цивилизацияси марказида у билан учрашув бўлиб ўтгани ҳақида хабар берилган эди.