DevFest — бу Google компанияси кўмагида ташкил этиладиган ва бутун дунё бўйлаб GDG (Google Developers Group) ҳамжамиятлари томонидан ўтказилади. Унинг асосий мақсади етакчи дастурчилар ўртасида тажриба алмашиш ва Google томонидан ишлаб чиқилган илғор технологиялар билан танишишдир.
Тадбир ташкилотчиларининг «Дарё»га хабар беришича, бу йилги DevFest конференциялари дунёнинг 143 та шаҳрида ўтказилиши ҳамда унда 125 000 дан ортиқ иштирокчилар ташриф буюриши режалаштирилган. Шу жумладан, Ўзбекистонда ҳам ушбу тадбир 2-бор Тошкент шаҳридаги Инҳа университетида бўлиб ўтади ва у кўплаб дастурчилар, лойиҳа менежерлари, таҳлилчилари ва бошқа IT мутахассисларини бирлаштиради.
Тадбирда Web, Mobile ва Cloud соҳаси бўйича кўплаб халқаро ва маҳаллий маърузачилар тақдимотлари бўлиб ўтади. Бу йил конференцияда Google технологиялари иштирокидаги ишланмалар бўйича техник экспертлардан ташқари, лойиҳаларни ривожлантириш ва ишлаб чиқиш соҳасидаги мутахассислар ҳам сўзга чиқади — уларнинг барчаси ўз тажрибалари ва инновациялари билан бўлишади.
GDG DevFest Tashkent—2019 га ташриф — янги технологиялар ҳақида янада чуқурроқ ўрганиш, тренддаги технологиялар бўйича ўз маҳоратингизни ошириш, ҳамкасблар билан янги маҳсулотларни муҳокама қилиш ва йирик IT-ҳамжамияти аъзоси бўлиш имкониятидир. Сиз норасмий муҳитда турли соҳалардаги сўнгги технологик тенденциялар ҳақида ўз соҳаси мутахассислари билан суҳбатлашишингиз ҳамда қизиқтирган саволларингизни беришингиз мумкин. Конференцияда қатнашиш бепул.
Изоҳ (0)