Ўзбекистонда мактаб ўқувчилари учун махсус мобил алоқа дастурини ишлаб чиқиш таклиф қилинди

Ўзбекистонда мактаб ўқувчилари учун махсус School mobile мобил алоқа дастурини ишлаб чиқиш таклиф қилинди. Бу ҳақда «Менинг фикрим» порталида тегишли петиция жойлаштирилди, деб ёзади Sputnik.

Мурожаат муаллифига кўра, катталар учун мўлжалланган аксарият сайтларга кириш ва улардаги маълумотлардан фойдаланиш болалар ҳамда ўсмирлар ўртасида авж олиб бормоқда.

Петицияда айтилишича, мактаб ўқувчилари учун махсус School mobile дастурий воситаларини яратиш ва татбиқ қилиш зарур.

Дастур асосида ишлайдиган мобил алоқа воситаларида қуйидаги қулайликлар ва чекловлар бўлиши лозим:

Дастурнинг имкониятлари: турли тиллардаги луғатлар; дарс жараёнида керак бўлиши мумкин бўлган дастур ва иловалар; интерактив ва интеллектуал ўйинларга асосланган махсус дастурлар.

Дастурдаги чекловлар: интернет тармоғига уланиш имконияти; видеороликлар кўриш имконияти чекланади.

Петиция муаллифи фикрига кўра, School mobile мобил алоқа дастури таълим масканларида мобил алоқа воситаларини тақиқлашдан кўра кўпроқ самара бериб, дарс вақтида ўқувчининг диққатини жамлаши, чуқур билим олишига хизмат қилади.