Бразилиянинг Минас-Жерайс штатидаги Вале компаниясига тегишли тўғоннинг ёрилиб кетиши оқибатида ҳалок бўлганлар сони 121 кишига етди, 226 киши бедарак йўқолган, деб тахмин қилинмоқда. Бу ҳақда «РИА Новости» хабар бермоқда.
Аввалроқ ҳодиса оқибатида 115 киши ҳалок бўлгани, 248 киши бедарак йўқолган деб тахмин қилинаётгани ҳақида хабар берилган эди. Қайд этишларича, ҳозиргача қурбонлардан 94 нафарининг шахси аниқланган.
Брумадиню муниципалитетидаги Вале компаниясига тегишли тўғон 25 январь куни ёрилиб кетган эди; ҳодиса оқибатида лой оқими Вале компаниясининг маъмурий биноси ва аҳолининг уйларини ювиб кетган. Маълумотларга кўра, қутқарув ишлари бир неча ҳафтага чўзилиши мумкин.
Аввалроқ тўғоннинг ёрилиши акс этган видеоёзувлар эълон қилингани ҳақида хабар берилган эди.