АПЛ. «Ман Юнайтед» 4 та, «Ман Сити» 3 та, «Челси» эса 1 та гол уриб ютди (видео)

30 декабрь, якшанба куни футбол бўйича Англия премьер лигасининг 20-тур баҳслари доирасида сўнгги 3 та ўйин бўлиб ўтди.

Лондоннинг «Челси» клуби меҳмонда «Кристал Пэлас» билан баҳс олиб борди. Учрашувнинг 51-дақиқасида «аристократлар» ярим ҳимоячиси НъГоло Канте гол уриб, жамоасига ғалаба келтирди.

Сўнгги 2 турда мағлуб бўлган «Манчестер Сити» эса сафарда «Саутҳэмптон» билан 3:1 ҳисобида енгди. Барча голлар 1-бўлимда киритилди. Учрашувнинг 10-дақиқасида Давид Силва Алекс Маккарти дарвозасини ишғол қилган бўлса (0:1), 37-дақиқага келиб, мезбон жамоа аъзоси Пьер Ҳойберг ҳисобни тенглаштирди (1:1). 1-бўлимнинг сўнгги дақиқаларида (45) Жеймс Уорд-Проузнинг автоголи эвазига «шаҳарликлар» ҳисобда олдинга ўтиб олди. Орадан ҳеч қанча вақт ўтмай, 1-бўлимга қўшиб берилган дақиқаларда Серҳио Агуэро гол уриб, ғалабани мустаҳкамлади.

Турнинг сўнгги ўйини «Олд Траффорд» стадионида бўлиб ўтди. Унда Оле-Гуннар Сульшер қўл остидаги «Манчестер Юнайтед» клуби «Борнмут»ни қабул қилди. Учрашувнинг 5- ва 33-дақиқаларида Поль Погба дублга эришган бўлса, 45-дақиқага келиб, Маркус Рэшфорд Антони Марсиалнинг узатмасини голга айлантирди (3:0). 1-бўлимга қўшиб берилган дақиқада «Борнмут» ҳимоячиси Натан Аке бурчакдан оширилган тўпни Давид де Хеа дарвозасига жойлаб қўйди.

2-бўлимнинг 70-дақиқасида Ромелу Лукаку Маркус Рэшфорд ўрнига захирадан майдонга тушди ва орадан 2 дақиқа ўтиб ўз ҳисобига ёздириб қўйди. 79-дақиқада Эрик Байи қизил карточка олганлиги сабабли «қизил иблислар» ўйинни бир киши кам бўлиб якунлади.

Погбанинг 1-голи

Погбанинг 2-голи

Рэшфорднинг голи

Акенинг голи

Лукакунинг голи