Россия президентининг Ўзбекистонга ташрифини 200 дан ортиқ журналист ёритади

Россия Федерацияси Президенти Владимир Путин ҳамда ушбу давлат делегацияси ташрифини, шунингдек, ташриф доирасида ўтказиладиган тадбирларни маҳаллий ҳамда хорижий оммавий ахборот воситалари орқали тезкор ва кенг ёритишни таъминлаш мақсадида «Ўзэкспомарказ»да Матбуот маркази ташкил этилди. Бу ҳақда Матбуот ва ахборот агентлиги матбуот хизмати хабар берди.

Журналистларнинг қулай фаолият юритишлари учун Матбуот марказида замонавий техник ускуналар, тезкор интернет алоқаси ҳамда бошқа зарур шароитлар яратилди.

Ушбу ташриф ҳамда унинг доирасидаги тадбирларни ёритиш учун Россия Федерациясидан 27 оммавий ахборот воситаси ўзининг 100 га яқин журналист ҳамда техник ходимлари билан иштирок этиши кутилмоқда. Шунингдек, 10 губернаторнинг Ахборот хизмати вакиллари қатнашиш истагини билдирган бўлса, мамлакатимизда доимий аккредитациядан ўтган 31 журналист ҳам бу жараёнларни ёритишда иштирок этади.

Бундан ташқари маҳаллий оммавий ахборот воситаларининг 150 га яқин вакиллари ҳам тадбирларни ёритишда бевосита қатнашади.

Россия Федерацияси Президентининг Ўзбекистон Республикасига давлат ташрифи доирасида илк бор Таълим форуми ва «Ўзбекистон–Россия» ҳудудлараро ҳамкорлик форуми ўтказилади, шунингдек, мамлакатимизда атом электр станцияси қурилиши бошланишига бағишланган маросим бўлиб ўтади.

Матбуот маркази 2018 йил 17 октябрдан ўз фаолиятини бошлади.