«Қувноқлар ва зукколар» кўрик танлови бадиий раҳбари Олимжон Худойназаров «Дарё» интернет-нашрига эксклюзив интервью берди. Интервьюни журналист Феруз Муҳаммад уюштирди.
Олимжон Худойназаров интервью давомида «Дизайн» жамоасининг ижтимоий тармоқларда тарқалган бачкана аудио ҳазиллари ва жамоанинг лицензияси бекор қилинганлигига муносабат билдирди.
Тўғрисини айтсам мен ўша ижтимоий тармоқларда тарқалган аудиони шахсан эшитмадим, лекин нима воқеа юз берган, қанақа ҳазил кетиб қолганлиги таърифини эшитдим. Мен уларни бу ҳазилни гапиргани учун оқламайман. Ҳар битта нарсада меъёр бўлиши керак. Бироқ қарс икки қўлдан чиқади. Ўша даврада ўтирганлар, ҳазилларни эшитганлар қийқириб, мазза қилиб кулган бўлса керак. Буни кейин қандай виждон билан тарқатиб юбориш мумкин билмадим. Қайтариб айтаман «Дизайн» жамоаси қўйган ҳазиллар тўғри қўйилган деган фикрдан йироқман, улар меъёрдан чиқишган, гапириладиган ва гапирилмайдиган гап бор.Санъатда шунақаки, агар халқ олқишлаб турса, унга янада кўпроқ нарсани бергингиз келади. «Дизайн» жамоасининг вакиллари Дилшод, Саъдулла, Қобилларнинг ўзларига ҳам «ошириб юборяпсизлар, косанинг тагидаги нимкосани очиб қўяяпсизлар» деганман. Асли бундай олиб қарасангиз аскиянинг тагидаги асосий урғу ҳам ўша мавзу, аммо шу пайтгача нима учун аския қадрланиб келади, чунки ҳазилни қандай тақдим қилишга боғлиқ, қанақанги ўраб беришга боғлиқ, аскияда косанинг тагидаги нимкоса ҳеч қачон очиб кўрсатилмайди. «Дизайн» жамоасининг баъзи чиқишларида нимкосагача очиб кўрсатилгани учун ҳам мухлислар «бачкана қилди, қўполлашди» дейишади, бу бор гап.
Танганинг иккинчи томони шундаки, нимага унда «Дизайн» жамоаси бир ҳафталик концертини эълон қилиши билан, концерт билетлари 10-15 кун ичида тезда сотилиб кетади, демак талаб бор. Лекин санъаткор минг талаб бўлганда ҳам, меъёр деган нарсани, уни ким эшитаётганини ҳам ҳисобга олиши керак. Шунинг учун мен «Дизайн» жамоасини оқламоқчи ҳам, қораламоқчи ҳам эмасман. Менимча йигитлар қилган хатоларини тушунишди.
Олимжон Худойназаров, «Қувноқлар ва зукколар» кўрик танлови бадиий раҳбари