Самарқандда ижарачини чув туширган фирибгарга суд ҳукми ўқилди

Самарқандда фирибгарлик устида қўлга тушган фуқаро устидан суд бўлиб ўтди. Бу ҳақда «Дарё» мухбири Фарҳод Норбўтаев маълум қилди.

2017 йилнинг 14 июлдан 24 июль кунига қадар Самарқанд тумани, «Бухорий» маҳалласида яшовчи Ф.С.нинг уйида вақтинча ижарада яшаб келган хавфли рецидивист Рустам Ниёзхонов уй эгасини Иштихон туманида тилла буюмлар сотадиган савдо дўкони борлигини билдириб, унга оғирлиги 15 грамм бўлган тилла узук олиб келиб беришни ваъда қилиб, 600 минг сўм пулини қўлга киритган.

Рустам Ниёзхонов «Бухорий» маҳалласида жойлашган «Ўктам лазер оши» ошхонасида ишловчи Ф.С.нинг вояга етмаган ўғли Ф. Д.ни Иштихон туманида жойлашган уйида қўйлари кўплигини айтиб, унга уч бош қўй олиб келиб беришни ваъда қилган ва алдов йўли билан 550 минг сўм пулини олган.

Сўнг Рустам Ниёзхонов Ф. С.нинг уйда йўқлигидан фойдаланиб 1 миллион сўм, 600 минг сўмлик «лодка» номли аёллар узуги, 1,5 миллион сўмлик узук ва сирға комплекти, миллион сўмлик Nokia 5800 телефони, 100 минг сўмлик иккита 8 Гб ли флеш-карта, жами 4,2 миллион сўмлик мол-мулкларни ўғирлаган.

2017 йилнинг октябрь ойи бошларида Рустам Ниёзхонов тасодифан танишиб қолган, Самарқанд шаҳар, Бағдод кўчасида яшовчи С.Ш.нинг уйига бориб, 4 миллион сўмлик Toshiba ноутбукини ва 1,6 миллион сўмлик Sony фотоаппаратини ўғирлаб кетган.

Жиноят ишлари бўйича Самарқанд суди судьяси Д. Нуралиев раислигида бўлиб ўтган судда Ниёзхонов Рустамнинг жиноий ҳаракатлари кўриб чиқилди. Суд давомида гувоҳлар ва жабрланувчиларнинг фикрлари тўлиқ тингланиб, воқеа тафсилотлари тўлиқ урганилиб суднинг ҳукми эълон қилинди.

Суд ҳукмига кўра Ниёзхонов ЖКнинг 168-моддаси 3-қисми «б» банди, 169-моддаси 3-қисми «а» банди билан 5 йил 4 ой муддатга озодликдан маҳрум қилиш жазоси тайинланди. Шунингдек, у ЖКнинг 60, 61-моддалари тартибида жиноят ишлари бўйича Иштихон туман судининг 2015 йил 8 сентябрь кунидаги ҳукми билан ўталмай қолган 11 ой 23 кун ахлоқ тузатиш ишлари жазосини ҳукм билан тайинланган жазога қисман қўшиб, унга узил-кесил ўташ учун 5 йил 6 ой озодликдан маҳрум қилиш жазоси тайинланди.