Италияда чоп этиладиган нуфузли Corriere Della Sera газетаси ёз фаслида саёҳатга чиқиш тавсия этиладиган мамлакатлар рейтингини эълон қилди. Ўзбекистон улар орасидаги энг мақбул йўналишлар қаторидан жой олган, деб хабар беради ЎзА.
Ўзбекистон ёзги таътилни ўтказиш учун Уругвай, Андаман ороллари, Замбия ва Финляндия каби энг оммабоп бешта сайёҳлик йўналиши рўйхатига киритилган.
Ўз тадқиқотларини айнан Ўзбекистондан бошлаган нашр экспертлари бу йўналишга «юқори тезликдаги Ипак йўли» дея таъриф берган.
«Марказий Осиё мамлакатлари орасида фақат Ўзбекистонда юқори тезликда ҳаракатланувчи поездлар Ипак йўли бўйидаги бетакрор маданий меросга эга шаҳарларни бир-бири билан боғлайди. Тошкентдан Самарқандгача (344 километр) бор-йўғи икки соат, сўнгра Бухорогача (пойтахтдан 600 километр) 3,5 соат вақт кетади холос», — деб ёзади газета.
Тадқиқотда таъкидланганидек, «кўпгина қийинчиликларга дуч келинаётганига қарамасдан, Ўзбекистон Президенти Шавкат Мирзиёев бошчилигида ҳаётга тадбиқ этилаётган янги сиёсат мамлакатни демократия йўлидан етакламоқда. Бироқ ҳаммага таниш бўлган ўзбекона самимият ўзгармасдан қолади».
Мамлакатдаги меъморий обидалар ҳақида тўхталар экан, Италия нашри Бухорони муқаддас шаҳар, «ислом қуввати, дин ва маданият юраги», дея таърифлаган.
«Шаҳрисабз минтақанинг асосий шаҳарларидан бири, Амир Темур туғилган гўша, Хива — энг фусункор шаҳар, Самарқанддаги машҳур Регистон майдони ЮНЕСКОнинг Бутунжаҳон мероси рўйхатига киритилган энг гўзал қадамжолардан бири, Улуғбек расадхонаси — Ўрта асрнинг энг машҳур дурдонасидир», — қайд этади Corriere Della Sera.
Изоҳ (0)