Global Petroleum Prices халқаро рейтинг агентлиги дунё мамлакатларида сотувда бўлган бензин нархидан келиб чиқиб давлатлар рейтингини тузди.
Рўйхатга Венесуэла етакчилик қилган бўлиб, ушбу мамлакатда бензин нархи 1 сентни ташкил этади. Ундан кейинги поғоналардан Судан (34 сент), Кувайт (35 сент), Эрон (36), Миср ва Жазоир (37 сент) ўрин олди.
Рўйхатнинг охирини Исландия (2,08 доллар), Гонконг (2,02 доллар) ва Норвегия (2 доллар) банд этган.
2018 йилнинг 26 февралидаги маълумотларга кўра, Ўзбекистон мазкур рўйхатдан 55-ўринни эгаллаган. Ўзбекистонда бир литр бензин нархи 96 сентга тенг. Минтақанинг бошқа мамлакатлари эса рўйхатнинг юқорироғидан жой олган: Туркманистон 8-ўрин, (43 сент), Қозоғистон 15-ўрин (55 сент), Қирғизистон ва Афғонистон 22-ўринда бўлишиб турибди (65 сент). Тожикистон рўйхатга киритилмаган.
Россия эса рейтингнинг 27-поғонасини банд этди (бир литр бензин 73 сент).
Global Petroleum Prices’нинг аниқлик киритишича, бу каби кўрсаткичлар мамлакатлардаги бензиннинг таннархига эмас, балки ҳар бир давлат бозоридаги солиққа тортишнинг ўзига хос хусусиятларига боғлиқ.