Кубалик боксчиларни таслим қилган Uzbek Tigers бугун Колумбиядан келган чарм қўлқоп усталарини синовдан ўтказади

WSB мусобақасининг 2-турида Cuba Domadores клубини мағлуб этиб, океан ортидаги мағлубият аламини олган Uzbek Tigers бугун — баҳорнинг илк кунида Colombia Heroicos боксчиларини қабул қилади.

Якуний ҳисоб: Uzbek Tigers — Cuba Domadores 4:1. Сўнгги жангда Санжар Турсунов Эрисланди Савонни таслим қилди

Бокс оқшомига яна бир бор Тошкентдаги «Universal» спорт саройи мезбонлик қилади. У 19:00 да бошланади.Колумбияликларга қарши жангларни Кубада мағлуб бўлган ўзбекистонлик боксчилар ўтказади. Таркибда фақатгина 1 та ўзгариш бор. -81 килограмм вазн тоифасида рингга чиқувчи Бектемир Мелиқўзиев Кубага бора олмаганди. Энди эса у жароҳатидан фориғ бўлиб, Тошкентда жанг қилишга тайёр бўлиб турибди.

Uzbek Tigers — Colombia Heroicos

• -52 кг: Худойназар Файзов — Кейбар Авила
• -60 кг: Шунқор Абдурасулов — Дуван Зулета
• -69 кг: Маҳмуд Ғоипов — Александр Ранхел
• -81 кг: Бектемир Мелиқўзиев — Диего Мотоа
• +91 кг: Баҳодир Жалолов — Кристиан Салкедо

МОҚ матбуот хизматининг хабар беришича, худди ўтган гал бўлгани каби, «Universal» спорт мажмуасига бу сафар ҳам уруш ва меҳнат фахрийлари, меҳрибонлик уйи тарбияланувчилари ҳамда жисмоний имконияти чекланган болалар ҳам ташриф буюради.

Colombia Heroicos бунгача Caciques Venezuela билан иккита жанг ўтказди. Бирида колумбияликлар, иккинчисида эса венесуэлаликлар 3:2 ҳисобида зафар қучди. Колумбияликлар, шунингдек, Кубада 0:5 ҳисобида енгилганди.