Испания Ла Лигасининг кеча — 24 февраль куни ўтган ўйинларида «Реал» 4 та, «Барселона» 5 та гол фарқи билан зафар қучди. Ҳар икки клубнинг етакчи футболчилари — Месси ва Роналду дублга эришди.
«Барселона» ва «Реал» учун аталган кун. Ҳар икки клубнинг энг машҳур триосидан голлар шоуси
Криштиану Роналду
Криштиану Роналду кеча «Алавес» дарвозасига белгиланган пенальтини дўсти Карим Бенземага бериб, кўпчиликнинг олқишини олди. Бу билан Роналду машҳур BBC (Bale, Benzema, Cristiano) аъзоларининг 2 йил кутилган миссияси бажаралишига эришди. Яъни, трионинг ҳар бир аъзоси ўз номини таблога ёзиб қўйди.Ўз навбатида португалиялик футболчининг ўзи ҳам сийланди. У кеча Испания Ла Лигасидаги 300-голини уришга эришди. Бунинг учун Криштига 285 та ўйин керак бўлди. Яъни, футболчи ҳар ўйинда ўртача 1,05 тадан гол уриб келмоқда.
Испан нашрларининг қайд этишича, Роналду 300 та голини уриш учун Мессидан 41 та ўйин камроқ сарф этган. Лео Ла Лигадаги 300-голини урганида, 326-ўйинда майдонга чиқиб келганди.
Ҳозирча Криштиану Роналду фаолияти давомида 49 марта хет-трик қайд этган. Кеча у яна бир юбилейни нишонлашдан кўра, Бенземанинг гол уришини афзалроқ билди.
Лионель Месси
Месси ҳам бир четда қараб турмади. У Испаниянинг турли — 36 клуби дарвозасига гол уриб, рекорд ўрнатди. Бунгача «Реал» афсоналаридан бири Раул Гонсалес ҳамда «Атлетик» юлдузи Ариц Адурис 35 та испан клуби дарвозасига гол ургани билан ёдда қолганди. «Жирона» эса Мессининг «36-қурбони» бўлди.Аргентиналик ҳужумчи, шуниндек, Испания чемпионатида энг кўп голли пас берган футболчига айланди. Бунгача «Реал» афсоналаридан бири Мичел 147 та голли узатма билан пешқадам эди. Мессида эса голли паслар сони энди 148 тани ташкил қилмоқда. Ва бу ҳали ҳаммаси эмасдек.
Месси Ла Лигада энг кўп гол урган футболчи ҳамдир. «Жирона»га қарши ўйиндаги дублни ҳам қўшиб ҳисобласа, унинг аниқ зарбалари сони 371 тага етиб улгурди.