Ўзбекистонда диний зиёрат туризми ривожлантирилади

Шавкат Мирзиеёв «Кириш туризмини ривожлантириш чоралари тўғрисида»ги қарорни имзолади. Бу ҳақда «Дарё»нинг ҳукуматдаги манбалари маълум қилди.

Қарорда «Ўзбекистон Республикаси туризм салоҳиятини ривожлантириш учун қулай шароитлар яратиш бўйича қўшимча ташкилий чора-тадбирлар тўғрисида»ги Президент фармони ижроси доирасида қатор чораларни амалга ошириш кўзда тутилган.

Жумладан, ҳужжатнинг учинчи бандига мувофиқ, Дин ишлари бўйича қўмитаси, Ислом цивилизацияси маркази ва Туризмни ривожлантириш давлат қўмитаси таклифига биноан Вазирлар Маҳкамаси ҳузуридаги Дин ишлари бўйича қўмитасида диний зиёрат туризмини ривожлантириш маркази бўлими ташкил этилади.

Унинг зиммасига юкланадиган асосий вазифа — ОАВда, шу жумладан, чет эл ахборот каналларида Ўзбекистоннинг ислом ва бошқа жаҳон динларининг маданий-тарихий ҳамда илмий-теологик маркази сифатидаги ўрни бўйича тарғибот ишларини олиб бориш.