Арда Туран «Барселона» билан 2,5 йилга хайрлашди ва «Истанбул Бошоқшеҳир» клубига бориб қўшилди

Туркиялик футболчи Арда Туран турк клуби учун 2,5 йилга ижарага берилди. Бу маълумотни «Барселона» матбуот хизмати тасдиқлади.

Туран шу мавсум сўнгига қадар «Истанбул Бошоқшеҳир» сафида тўп суради ва яна 2 та тўлиқ мавсумни шу клубда ўтказади. Ижара шартномаси ўз ичига қандай бандларни олгани маълум эмас.

Туран 2015 йил ёзида каталонияликлар билан шартнома имзолаб, «Атлетико» сафидан «Барселона»га етиб келганди. Бироқ дебютини у салкам ярим йил кутишига тўғри келди. ФИФА «Барселона»га янги футболчиларни рўйхатдан ўтказишни тақиқлаб қўйгани учун, Туран фақатгина 2016 йил январидагина катта футболга қайтди.

Ўтган давр мобайнида Туран каталонияликлар билан 6 та мусобақада ғолиб чиқишга улгурди. Бироқ айни пайтда унинг хизматлари Эрнесто Вальверде жамоаси учун у қадар шарт эмас.