Пойтахт ҳудудида жиноятчиликнинг барвақт олдини олиш ва ҳуқуқбузарликка қарши курашиш борасида, Тошкент шаҳар ИИББ ходимлари томонидан жорий йилнинг 20 ноябрь кунидан бугунги кунга қадар «Тозалаш-Антитеррор» комплекс тадбири амалга ошириб келинмоқда. Бу ҳақда Тошкент шаҳар Ички ишлар бош бошқармаси расмий сайтида хабар берилди.
Жумладан, жорий йилнинг 20 ноябрь кунидан 14 декабрь кунига қадар Тошкент шаҳри ҳудудида ўтказилган «Тозалаш-Антитеррор» тадбири доирасида қуйида қонун бузилиш ҳолатлари аниқланди. Жумладан:
- Жами очилган жиноятлар 461 тани ташкил этиб, шундан 382 та жиноятр иссиқ изидан фош этилган;
- Тошкент шаҳар ИИББ томонидан қидирувда бўлган 140 нафар шахслар, шунингдек бошқа вилоятлар ИИБ томонидан қидирув эълон қилинган 12 нафар шахслар ушланди;
- Тошкент шаҳрида фоҳишалик билан шуғулланувчи жами 191 нафар аёлларга нисбатан Ўзбекистон Республикаси МЖТКнинг 190-моддасига асосан маъмурий баённомалар расмийлаштирилган бўлиб, шундан 180 нафар аёллар бошқа вилоятлардан Тошкент шаҳрига келиб, фоҳишалик билан шуғулланиб келганликлари аниқланган;
- Республиканинг Қашқадарё, Навоий, Андижон, Тошкент вилоятлари ИИБ Жазони ижро этиш бўлимлари ҳисобида турган жами 11 нафар маҳкумлар ҳозирги вақтда ўз манзилларида яшамасдан, Тошкент шаҳрида юрганликлари аниқланиб, Тошкент шаҳар ИИББ Реабилитация марказига олиб борилган;
- 22 756 нафар шахсларга нисбатан паспорт-виза тартиботини бузганликлари учун маъмурий баённомалар расмийлаштирилган бўлиб, шулардан 159 нафари муқаддам судланганлар ҳисобланади;
- «Назорат» тадбири давомида 250 нафар маъмурий назорат таъсирига тушувчи шахсга нисбатан маъмурий назорат ўрнатилди;
- шунингдек, ёнғин хавфсизлиги ҳамда санитария қоидаларига риоя қилиниши борасида 1264 та корхона ва ташкилотлар, 25 760 та аҳоли турар шахсий хонадонлари, 1964 та кўп қаватли уйлар ва улардаги хонадонлар ёнғин-техник текширувдан ўтказилган бўлиб, натижада 930 та ҳолатларда мазкур қоидаларга риоя қилинмаганлиги аниқланиб, тегишли ҳужжатлар расмийлаштирилган;
- 116 нафар спиртли ичимликка ружу қўйган шахслар аниқланиб, уларнинг барчаси мажбурий даволаниш учун тиббий муассасага жойлаштирилган;
- 157 нафар тажовузкор руҳий касал шахслар мажбурий тиббий даволанишга ётқазилган;
- 31 нафар Ахлоқ тузатиш ишлари жазоси тайинланган маҳкумлар жазо ўташдан бўйин товлаганликлари сабабли туман судларига тақдимномалар киритилиб, уларнинг барчаси туман суди ажримига асосан Жазони ижро этиш муаасасасига юборилди.
- 25 та фоҳишахона сақлаш ва қўшмачилик қилиш ҳолати аниқланди.
- 2 та ҳолатда қурол ва ўқ-дориларни қонунга хилоф равишда эгалик қилиш аниқланди.
Ҳозирда бу борадаги ишлар фаол давом эттирилмоқда.
Изоҳ (0)