Гроссмейстер Антон Филиппов терма шарафини ҳимоя қилишдан бош тортгани учун стипендиядан маҳрум қилинган

Ўзбекистон шахмат федерацияси гроссмейтер Антон Филипповнинг Ўзбекистон терма жамоасидан кетишга қарор қилгани борасида тушунтириш берди. Унинг баёни «Оламспорт» нашрида келтирилган.

Ўзига бўлган муносабатдан норози ўзбекистонлик гроссмейстер терма жамоадан кетганини эълон қилди

Аввалроқ Антон Филиппов Ўзбекистон терма жамоаси аъзолари учун яратилган шароитлардан нолиб, бош жамоа учун бошқа дона сурмаслигини маълум қилганди. Бу қарорга гроссмейстер унга белгиланган стипендия тўхтатилгачгина келгани айтилганди.

Шахмат федерацияси бош мураббийи Фарҳод Собиров эса бу фикрларининг аксини баён қилди. Унинг сўзларига кўра, Филиппов терма жамоа шарафини ҳимоя қилишдан бош тортгани учунгина стипендиядан маҳрум қилинган. У 2016 йил Бутунжаҳон шахмат Олимпиадасида иштирок этгани учун, федерация Филипповга энергия сарфи ҳамда жисмоний захирани тиклаши учун имтиёз берган.

Бироқ Филиппов сентябрь ойи Ашхободда ўтган усти ёпиқ иншоотлардаги Осиё Ўйинларида Ўзбекистон шарафини ҳимоя қилишдан бош тортган. Шунингдек, бутун 2017 йил давомида терма жамоа сафида мусобақаларда қатнашмаган. Шу тариқа эркаклар термаси аъзолари учун белгиланган уч ставкага тенг стипендия тўхтаган.

Терма аъзолари учун бу жуда оз. Аммо қолган аъзолар терма шарафини ҳимоя қилиб, эвазига ҳеч қандай компенсация олмаса, шахматчилар орасида тушунмовчиликлар келиб чиқарди.

Фарҳод Собиров, терма жамоа устози

Антон Филиппов стипендиядан маҳрум қилингани ҳақида Facebook саҳифасига ёзгач, гроссмейстер Нафиса Мўминованинг отаси ҳам қизи стипендия олмаётгани борасида изоҳ қолдирганди. Бу изоҳга аёллар термаси устози Олга Собирова жавоб қайтарган.

Нафиса Мўминовага 2017 йилнинг 1 июлига қадар компенсация берилди. Лекин у туғуруқ таътилига чиққанди. Бунинг натижасида Марказий Осиё чемпионатида, кейинроқ усти ёпиқ иншоотлардаги Осиё Ўйинларида Ўзбекистон жамоаси шарафини ҳимоя қила олмади. Мен унинг туғуруқ даври учун жавобгарликни бўйнимга ололмайман.

Мен аёллар термаси аъзоларига холисона муносабатдаман. Нафиса терма сафида мусобақаларда иштирок этишни бошлаши биланоқ компенсациядан фойдалана олади.

Олга Собирова, терма жамоа устози

Собированинг эътироф этишича, аёллар учун белгиланган компенсация ҳам эркакларники каби уч ставкага тенг.