Халқаро шахмат федерацияси (FIDE) президенти Кирсан Илюмжинов Тошкентга ташриф буюрди ва Миллий Олимпия Қўмитасида меҳмон бўлди. Унинг бошчилигидаги делегацияни МОҚ Бош котиби Ойбек Қосимов ҳамда Ўзбекистон Шахмат Федерацияси вице-президенти Хусан Турдиалиев кутиб олди.
28 ноябрь кунги расмий ташрифининг биринчи босқичида FIDE раҳбари ўзининг ҳамроҳи — ташкилот маслаҳатчиси Ирисхон Цукаев билан МОҚ биносига келди ва унинг музейида ўзбекистонлик спортчилар қўлга киритган ютуқлар билан танишди. Суҳбат давомида Илюмжинов МОҚ биносидаги шароитларга юқори баҳо берди. Бунгача у Тошкентда бир неча бор меҳмон бўлган эрсада, бу янги бинога унинг илк ташрифи эди, деб ёзди МОҚ матбуот хизмати.
Шундан сўнг МОҚ музокаралар залида меҳмонлар ва мезбонлар ўртасида учрашув бўлиб ўтди. Бу пайтда Илюмжинов ва делегациясининг қаршисидан МОҚ президенти Алишер Султонов, Спорт Қўмитаси раиси Рустам Қурбонов, МОҚ бош котиби Ойбек Қосимов жой олди.
Учрашув давомида Кирсан Илюмжинов ўзбекистонлик спортчилар халқаро майдонда бежизга юқори натижалар кўрсатмаётгани ҳақида айтиб, бунинг замирида катта меҳнат ва спортчилар учун яратилган шароит ётганига урғу берди. Мамлакат шахматчиларининг халқаро майдондаги обрўси эса кун сайин ўсиб бораётгани таъкидланди.
Шахмат ривожланиши Ўзбекистонда йилдан йилга ўсиб бораётганидан келиб чиқиб, энди уни алоҳида фан сифатида ўрганиш вақти келгани борасидаги масалани Кирсан Илюмжинов кўтарган. Бунда мамлакатдаги ўрта ва олий таълим муассасалари ўқув дастурига шахмат фанини ҳам киритиб, олий ўқув юртларида шахмат кафедраларини очиш мумкинлиги таъкидланган. Бу борада хорижий тажрибадан фойдаланиш ҳам мумкин. Масалан, ўз вақтида Жанубий Африка Республикасида Нелсон Мандела, яқинда эса Молдовада мамлакат президенти Игорь Додон билан ҳамкорликда катта ҳажмдаги иш олиб борилган.
Учрашув якунида Алишер Султонов меҳмонларга эсдалик совғаларини топширди. Ўз навбатида Кирсан Илюмжинов самимий қабул учун миннатдорчилик изҳор этди. Кейинроқ FIDE президенти олдиндан белгиланган дастурга кўра Ўзбекистон Халқ таълими вазирлигида учрашув ўтказди ва пойтахтдаги болалар шахмат фестивалининг очилишида иштирок этди.
Изоҳ (0)