АҚШ Транспорт хавфсизлиги миллий бошқармаси 4 май, пайшанба куни автомобилларда юк ташиш билан шуғулланувчи компаниялар орасида мамлакатда олиб қочилган юк машиналари ёрдамида ҳужум амалга оширилиш эҳтимоли мавжудлиги ҳақидаги огоҳлантиришни тарқатди. Бу ҳақда CBS телеканали хабар бермоқда, деб ёзади «ТАСС».
Огоҳлантиришда ҳужум қилишнинг юқоридаги усули нисбатан жўн эканлиги таъкидланади. Унда, шунингдек, 2014 йилдан буён террорчилар юк машиналари ёрдамида камида 17 та ҳужумни амалга оширганлиги ва оқибатда 173 киши ҳалок бўлганлиги, 667 киши жароҳатланганлиги ҳақидаги статистика келтириб ўтилади. Бошқарма ўтган йили Ниццада содир бўлган терактда 84 киши ҳалок бўлганини алоҳида таъкидлаб ўтди.
Мамлакатнинг йирик полиция бошқармалари, жумладан, Нью-Йорк бошқармаси тегишли таҳдид ҳақида хабардор этилганлиги таъкидланади. Тарқатилган ҳужжатда ҳайдовчилар, йўловчилар ва ҳуқуқ-тартибот органлари вакиллари учун эҳтиёт чоралари рўйхати келтирилади.