АҚШнинг Нью-Жерси штати Бейонн шаҳрида катта бўлмаган самолёт турар-жой кварталига қулади. Ҳалокат оқибатида учувчи жабрланди, деб хабар бермоқда «РБК».
АҚШ фуқаролик авиацияси федерал бошқармасининг маълум қилишича, қулаган самолёт Лонг-Айленд (Нью-Йорк)дан учган Piper PA-28 бўлган. Ҳаво кемаси Куинс учувчилар мактабига тегишли экани таъкидланмоқда.
CBS’нинг қайд этишича, штурвал ортида 56 ёшли Жорж Петтуэй бўлган. Ҳаво кемаси бортида ундан бошқа ҳеч ким бўлмаган. Учувчи Озодлик ҳайкали яқинида парвоз қилаётганида ёрдам сўраган. Самолёт нима сабабдан қулагани ҳақида ҳозирча маълумот йўқ.
Самолёт автомобиль ёқилғи қуйиш шохобчасига қуламаслик учун тезкор бурилишни амалга оширди ва электр симларини узиб, ерга қулади. Ҳалокат оқибатида ҳеч ким жабрланмади, аммо ҳаво кемаси бир нечта машинага зарар етказди.
20 февралга ўтар кечаси АҚШда яна бир шахсий самолёт қулади. NBC 10 телеканалининг хабар қилишича, Пенсильвания штатида енгил моторли самолётнинг гольф майдонига қулаши оқибатида 3 киши жабрланди.
Ҳаво кемаси Butter Valley гольф майдонига қулади ва иккига бўлиниб кетди. Самолёт ичида бўлган икки киши енгил жароҳат олди ва тиббий кўрикдан ўтиш учун шифохонага юборилди.
Associated Press’нинг қайд этишича, самолёт ҳавога кўтарилганидан сўнг кўп ўтмай ерга қулаган. Авиаҳалокатга кучли шамол сабаб бўлгани келтирилмоқда.
«Дарё»нинг Telegram’даги расмий канали — @toshqindaryo’га аъзо бўлинг!