Дэвис Кубоги. Денис Истоминнинг ғалабаси эвазига Ўзбекистон Швейцария билан биринчи кунни 1:1 ҳисобида якунлади

Тенниснинг Жаҳон Кубогида иштирок этиш учун кураш олиб бораётган Ўзбекистон терма жамоаси плей-офф доирасида Швейцарияга қарши курашни бошлади.

Тўқнашувнинг биринчи кунида 1:1 ҳисоби қайд этилди. Ўзбекистоннинг биринчи ракеткаси Истомин рақибини мағлуб этган бўлса, Санжар Файзиев Тошкентга етиб келган меҳмон теннисчиларнинг энг яхшисидан енгилди.

Истомин жаҳон рейтингида 507-ўринни эгаллаб турган Энтони Белерни 6:3, 6:2, 6:4 ҳисобида мағлуб этишга муваффақ бўлди.

Ўзбекистонлик Санжар Файзиев эса дунё рейтингида 138-бўлиб турган 25 ёшли Хенри Лаксоненга ҳар учала сетда ҳам бир хил — 2:6 ҳисобларида имкониятни бой берди.

Эртага — 17 сентябрь куни Ўзбекистон — Швейцария ўйинининг жуфтлик беллашувлари бўлиб ўтади.