3 май, сешанба куни Ироқда ҳалок бўлган АҚШ ҳарбий-денгиз кучлари махсус топшириқли бўлинмаси жангчиси Чарльз Китинг ИШИД террорчилик гуруҳи жангариларининг ҳужуми чоғида америкалик ҳарбий маслаҳатчиларни ҳимоя қилаётган бўлган. Бу ҳақда АҚШнинг Ироқ ва Суриядаги аксилтеррорчилик операцияларида қатнашаётган қўшинлари расмий вакили полковник Стив Уоррен маълум қилди, деб ёзади «ТАСС».
«АҚШ ҳарбий хизматчилари консультация бериш билан шуғулланган ва пешмерг (курдларнинг ҳарбийлашган гуруҳлари)ни қўллаб-қувватлаган. Шу пайт уларга ИШИД жангарилари ҳамла қилган, шу туфайли улар жавоб зарбаси бериб, тезкор жавоб кучларидан ёрдам сўрашга мажбур бўлган. Улар жангда ғалаба қозонишга ёрдам берган, бироқ отишма натижасида махсус топшириқли бўлинма жангчиларидан бири ҳалок бўлган», — дея аниқлик киритди полковник.
Уорреннинг сўзларига кўра, жанг Ироқ шимолидаги Талл-Ускуф аҳоли пунктида, фронт чизиғидан тахминан 3,5 км нарида бўлиб ўтган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.