«Барселона» жамоаси ҳужумчиси Лионель Месси голландиялик футбол афсонаси Йохан Кройффнинг вафотига таъзия билдирди, деб хабар беради «Спорт-Экспресс».
Ўпка саратонига қарши бир неча йилдан буён кураш олиб борган Йохан Кройфф 24 март, пайшанба куни 68 ёшида вафот этди.
«Яна бир афсона бизни тарк этди», – деб ёзади Месси Facebook’даги саҳифасида.
Йохан Кройфф футболчи сифатида 1973 йилдан бошлаб беш йил давомида «Барселона» сафида ўйнаб, бир мартадан Испания чемпиони ва мамлакат Кубоги соҳиби бўлди. Футболчилик фаолиятини якунлаганидан сўнг, у 1988 йилдан 1996 йилга қадар «Барселона» бош мураббийи сифатида ишлаган. Ушбу вақт мобайнида Кройфф каталонияликларни тўрт карра Испания чемпиони, уч карра Испания Суперкубоги ва Испания Кубоги соҳибига айлантирди. Шунингдек, голландиялик мутахассис қўли остида «Барселона» Чемпионлар Лигаси ва УЕФА Суперкубоги ва Кубоклар эгалари кубоги соҳиби бўлган. Бундан ташқари, Кройфф уч карра «Олтин» тўп соҳиби ҳисобланади.
Изоҳ (0)