Футзал бўйича Осиё Чемпионати иккинчи туридан ўрин олган Ўзбекистон - Қирғизистон терма жамолари ўртасидаги ўйиндан кейин матбуот анжумани ташкил қилиниб, анжуманда Ўзбекистон терма жамоасининг мураббийи Хосе Мария Мендез иштирок этди. Бу ҳақда «Uff.uz» хабар қилмоқда.
«Ўйин жуда оғир кечди. Аслида Қирғизистонга қарши кечадиган ўйинлар ҳар доим оғир ўтади. Чунки жамоалар бир бирини яхши билади. Ўйинга келадиган бўлсак, биз уни тўлиқ назорат қилиб бордик. Ҳужум билан бирга ҳимояда ҳам яхши ўйнадик. Қирғизистон эса ўйин бошида берган зарбаси дарвоза устунига текканлиги инобатга олинмаса, ҳеч нарса қила олгани йўқ. Бугун бизнинг ҳужум чизиғимиз ҳам яхши ўйнади, деб айта олмайман. Биз кўпроқ гол уришни ўрганишимиз керак. Бу борада қиладиган ишларимиз кўп», ― деди Мендез.
Шунингдек, Ироқнинг «B» гуруҳида иккинчи ўринни олиш эҳтимоли катта эканлигига жавобан мураббий ― «Ироқ ҳақида умуман ўйлаганим йўқ. Фикр билдирадиган бўлсам, бу мусобақада кучсиз жамоанинг ўзи йўқ. Футзал ўсган, илгари беш, олти гол билан ғалаба қозониш мумкин эди. Энди эса фақат Эрон бу ишни уддаламоқда. Шундай экан, ҳар қандай ўйин катта аҳамият касб этиши мумкин. Тўғри, мен ҳозир қаҳрамонлик кўрсатиб, Эронга қарши ҳам ўйнашимиз мумкинлигини айтишим мумкин эди. Аммо биз Эрон қай даражада кучга эга эканини ҳис қилиб турибмиз ва тан олиб айтаман, гуруҳдан чиққач имкон қадар Эронга дуч келмасликка интилмоқдамиз. Бироқ шу билан бирга Ироқни ҳам, "V" гуруҳидаги бошқа жамоаларни ҳам ҳурмат қилишимизни билдирмоқчиман», ― дея таъкидлади.
Эслатиб ўтамиз, Ўзбекистон терма жамоаси муддатидан олдин чорак финалга йўлланма олганлиги хабар қилинган эди.
Изоҳ (0)