Янги йил арафасида Тошкент вилояти божхона бошқармаси «Янгийўл» ташқи иқтисодий фаолият божхона постининг, Қорақалпоғистон Республикасида эса «Даут ота» чегара-божхона постининг янги бинолари, шунингдек «Даут ота» постида хизмат қилаётган божхоначиларнинг оилалари учун ушбу ҳудудда бунёд этилган янги хизмат уйининг тантанали очилиш маросимлари бўлиб ўтди. Бу ҳақда Давлат божхона қўмитаси ахборот хизмати «Дарё»га хабар берди.
Қорақалпоғистон Республикаси божхоначилари учун фойдаланишга топширилган янги хизмат уйи икки қават ва 32 хонадондан иборатдир. Бу ерда 7,2 миллиард сўмлик қурилиш-монтаж ва ободонлаштириш ишлари амалга оширилди.
Тошкент вилояти Чиноз туманида жойлашган «Янгийўл» ташқи иқтисодий фаолият божхона пости янги замонавий биносининг фойдаланишга топширилиши муносабати билан ташкил этилган тантанали тадбирда Тошкент вилояти божхона бошқармаси раҳбарияти, шахсий таркиби, кенг жамоатчилик ва оммавий ахборот воситалари вакилллари иштирок этди.
«Янгийўл» ТИФ божхона постида божхоначиларнинг самарали хизмат кўрсатишлари учун барча шарт-шароитлар яратилган. Бу ерда божхона расмийлаштируви ва божхона кўригини амалга оширувчи ходимлар учун шинам хоналар, замонавий мебель жиҳозлари, энг сўнгги русумдаги ахборот технологиялари божхоначилар томонидан ташқи иқтисодий фаолият иштирокчиларига юксак даражада божхона хизмати кўрсатилишини таъминлашда муҳим роль ўйнайди.
Божхона постида тадбиркорлар учун экспорт ва импорт операцияларини амалга оширишда «Бир дарча» механизми йўлга қўйилган. Пост томонидан жорий йилнинг ўтган 9 ойи мобайнида 5 мингдан ортиқ божхона юк декларацияси электрон шаклда расмийлаштирилиб, давлат бюджетига ундирилган тўловлар ўтган йилнинг шу даврига нисбатан 9 фоизга ошишига эришилди.
«Янгийўл» ТИФ божхона постининг янги биносида фаолият кўрсатётган саккизта божхона брокерлик фирмаси учун ҳам барча шарт-шароитлар муҳайё қилинган. Бу ерда 30 га яқин ташқи иқтисодий фаолият иштирокчиларига тегишли юкларнинг темирйўл ва автотранспорт воситалари орқали импорт ва экспортга расмийлаштируви амалга оширилади.
Изоҳ (0)