Россия ўз самолёти билан боғлиқ ҳодиса бўйича Туркияга тушунтириш берди

Россия Туркияга Россия самолёти билан боғлиқ ҳодиса бўйича тушунтириш берди. Бу борада Россиянинг Анқарадаги элчихонасининг матбуот котиби Игорь Митяков маълумотига асосланиб, «РИА Новости» хабар бермоқда.

5 октябрь, душанба куни Туркия ташқи ишлар вазирлиги Россия ҳарбий самолёти Туркиянинг Сурия билан чегарадош Хатай вилоятининг Яйладоғ тумани атрофида ҳаво бўшлиғига кирганини хабар қилганди.

Митяковнинг айтишича, мазкур воқеа юзасидан Россия томони Туркиянинг Москвадаги элчихонасига керакли тушунтириш берган. «Ҳақиқатда Россия ҳарбий самолётининг Туркия ҳаво ҳудудини бузгани бор гап», — деди Митяков.

30 сентябрдан бошлаб Россия Сурия президенти Башар Асаднинг сўровига кўра ИШИД истеҳкомларига аниқ авиазарбалар беришни бошлади. Россия мудофаа вазирлигига кўра, Россия авиацияси жангариларнинг бошқарув тизимига,моддий-техник таъминотига ва террорчиларни тайёрлаш инфратузулмаларига сезиларли талофат етказган.