ZiyoNET порталида олий ўқув юртларига киришни истовчилар учун тест топшириш имкониятини ва батафсил маълумотларни тақдим этадиган янги «Абитуриент» бўлими очилди. Бу ҳақда портал маъмурияти «Дарё»га маълум қилди.
Бўлимда Ўзбекистоннинг турли ҳудудларидаги олий ўқув юртлари, ўтган йил учун ўтиш баллари, танланган ОТМ қандай мутахассисликларни тайёрлаши ёки танланган мутахассислик қайси ОТМларда тайёрланиши ҳақида маълумотлар, топшириладиган ҳужжатлар рўйхати, ҳужжатларни тўғри тўлдириш бўйича видеороликлар, имтиёзлар, тест вақтидаги талаблар ва тест варақасини тўлдириш намуналарини юклаб олиш имконияти мавжуд.
Абитуриентлар учун энг қизиқарли ва фойдали совға эса ҳақиқий шароитларга яқинлаштирилган (вақт ҳисоби юритиладиган) ҳолда тест топшириб кўриш имкониятидир. Саволлар ўтган йилги тестлар тўпламларидан ва бошқа манбалардан олинган. Тестларни бир неча марта топшириш мумкин. Тестдан олдин ОТМни танлаб, кейин ушбу ўқув юртига кириш эҳтимоли ҳақида маълумот ва бошқа ОТМларга топшириш учун тавсиялар олиш имконияти мавжуд.
Изоҳ (0)