Ислом Каримов Тошкент шаҳри сайловчилари билан учрашди

Тадбиркорлар ва ишбилармонлар ҳаракати – Ўзбекистон Либерал-демократик партиясидан Ўзбекистон Республикаси Президентлигига номзод Ислом Каримов 17 март куни Тошкент шаҳри сайловчилари билан учрашди, деб хабар бермоқда ЎзА.

Учрашувни Ўзбекистон Республикаси Президенти сайловини ўтказувчи 14-Тошкент шаҳар округ сайлов комиссияси раиси Ж.Иноғомов очди.

Ўзбекистон Республикаси Президентлигига номзод Ислом Каримов ўз сайловолди дастури юзасидан нутқ сўзлади.

Дастурда мамлакатимизда барча соҳаларда олиб борилаётган кенг кўламли иқтисодий ва ижтимоий-сиёсий ислоҳотларни янги босқичга кўтаришнинг устувор йўналишлари белгилаб берилган. Жумладан, саноатни диверсификация ва модернизация қилиш ҳисобидан иқтисодиётнинг рақобатбардошлигини ошириш, хусусий мулк ва тадбиркорлик ривожи йўлидаги барча тўсиқларни бартараф этиш, давлатнинг иқтисодиётдаги улушини қайта кўриб чиқиш, маҳаллийлаштириш дастурларини кенгайтириш, инвестициявий муҳитни янада яхшилаш каби муҳим масалалар қамраб олинган. Аҳоли бандлигини таъминлаш, биринчи навбатда, касб-ҳунар коллежлари битирувчиларини ишга жойлаштириш, чет давлатлар билан ўзаро манфаатли ҳамкорликни мустаҳкамлаш зарурлиги таъкидланган.

Тошкент шаҳри барча соҳалардаги тараққиёти, энг замонавий технологиялар билан жиҳозланган корхоналари, муҳташам иншоотлари, машҳур илм-фан марказлари, сўлим боғ ва хиёбонлари билан дунёга машҳур.

Иқтисодиётнинг барча тармоқларида амалга оширилаётган кенг кўламли ислоҳотлар пойтахтимиз салоҳиятини юксалтириш, аҳоли ҳаёт фаровонлигини муттасил оширишда асосий омил бўлмоқда.

Меҳнат фахрийси Т.Даминов, Ўзбекистон давлат консерваторияси талабаси, Зулфия номидаги Давлат мукофоти совриндори Н.Дадамуҳамедова ва бошқалар мамлакатимизда амалга оширилаётган беқиёс ўзгаришлар пойтахтимиз мисолида ҳам яққол ифодасини топаётганини таъкидлади. Президент сайловига тайёргарлик жараёни миллий қонунчилигимиз ва халқаро демократик тамойилларга тўла мос равишда ўтаётганини қайд этди. Сайловчиларни 29 март куни бўладиган Ўзбекистон Республикаси Президенти сайловида фаол иштирок этишга чақирди.