Чемпионлар лигаси доирасида «Локомотив» ва «Фулад» жамоалари ўртасида кечган учрашув якунига етгач ўтказилган матбуот анжуманида, аввало, эронликлар бош мураббийи Драган Скочич иштирок этди, деб хабар беради «Uff.uz».
«Биз учун бу натижа қониқарли. Бу ўйинда ҳеч қандай салбий ҳолат кўрмадик. Ўйинни жамоам анча асабий бошлади. Шунга қарамай тезда ўзимизга келиб олдик ва вазиятни ўнглашга муваффақ бўлдик», – деди бош мураббий.
Савол: Ўнинчи рақамли футболчидан қониқмагандек кўриндингиз?
Жавоб: Мен нафақат ўнинчи рақамли футболчи, балки жамоамдаги ҳар бир ўйинчининг дунёқарашидан қониқмадим. Эътибор берган бўлсангиз, илк дақиқалардан дарвозабоним сув ичишга тушиб кетди. Менга бундай ўйин тўғри келмайди. Мен тезкор ва шиддатли ўйин тарафдориман. Шунинг учун нафақат ўнинчи рақамли футболчи, балки барчага танбеҳ беришга ҳаракат қилдим. Биз бу ўйинда қониқарли натижага эришдик. Шу ўринда таъкидлаб ўтишим лозим, «Локомотив» таркибида тезкор футболчилар бор ва ҳимояда кўплаб муаммоларга дуч келдик.
Савол: «Локомотив» гуруҳдан чиқа олиш даражасида кучга эгами?
Жавоб: Ҳали бирор бир аниқ фикрга эга эмасман. Биз ёмон натижага эришмадик, ҳали олдинда ўйинлар кўп. Ўйлайманки, яхши натижага эришса, ҳар икки жамоа ҳам гуруҳдан чиқиши мумкин. Мен рақиблар ўйини натижасидан бохабар бўлиб турибман, нариги ўйинда ҳам дуранг қайд этилиши мумкин. Демак, гуруҳдан чиқиш имконияти катта.
Савол: Жамоангиз майдон марказини бой беришига сабаб нимада?
Жавоб: Умуман олганда ҳамма чизиқда хатоларга йўл қўйдик. Айниқса, қанотлардаги хатолар туфайли марказда бўшлиққа йўл қўйдик. Яна бир муаммо ҳозирда кўп футболчиларимиз жароҳат олган. Шу туфайли қайсидир бир позицияга футболчи тайинлашда қийинчиликка дуч келдик. Иккинчи бўлимда марказга эътиборни кучайтирдик. Афсуски, жамоамизда таркиб масаласида муаммолар кўп. Айтайлик ўн нафар футболчимиз армия ёшига етгани туфайли ҳарбий хизматга йўл олади. Бу ҳам бизнинг танловни анча қисқартириши турган гап.
Савол: Меҳди жароҳат олиб майдонга тушмагани борасида нима дея оласиз?
Жавоб: Бу футболчи биз учун муҳим аҳамиятга эга эди. У майдонга қайтишини кутмоқдамиз.
Савол: Ўтган турни «Ас Садд»га қарши ўтказгансиз. Бу жамоага қарши ўйнаган мураббий сифатида нима дея оласиз?
Жавоб: Бу жамоа ҳақида фикр билдириш жуда мураккаб. «Ас Садд» таркибида техник жиҳатдан кучли футболчилар бор. «Локомотив» келгуси ўйинда мана шундай футболчилардан эҳтиёт бўлиши лозим.
Изоҳ (0)