Автокросс бўйича Ўзбекистон кубогида Жиззах вилояти жамоаси биринчи ўринни эгаллади (фото)

2015 йилнинг 14-15 февраль кунлари Жиззах шаҳридаги «Наврўзбулоқ» пойгагоҳида автокросс бўйича Ўзбекистон кубоги мусобақалари бўлиб ўтди. Бу ҳақда Жиззах шаҳар ҳокимлиги ахборот хизмати хабар берди.

Ўзбекистон мудофаасига кўмаклашувчи «Ватанпарвар» ташкилоти, Ўзбекистон миллий автомобиль федерацияси, Республика техник ва амалий спорт турлари маркази, Жиззах вилоят ҳокимлиги ҳамкорлигида ташкил этилган мусобақада Тошкент, Наманган, Самарқанд, Бухоро, Қашқадарё, Сурхондарё ва мезбон Жиззах вилоятидан жами 10 дан ортиқ спорт клублари кубок баҳслари учун кураш олиб борди.

Мусобақанинг биринчи кунида мухлислар «А-7» ҳамда «А-8» синфига мансуб автомобиллар пойгаларига гувоҳ бўлди.

«А-7» русумли автомобиллар пойгасида «Шайхонтоҳур» ўқув спорт техника клуби вакили Фарҳод Даминов биринчи, «Жиззах-Бунёдкор» вакили Сарвар Тожиқулов иккинчи, Жиззах вилоят техник ва амалий спорт турлари маркази спортчиси Бахтиёр Тошбоев учинчи ўринни эгаллади.

«А-8» русумли автомобиллар баҳсида эса тошкентлик Ростислав Беляков биринчи, яна бир тошкентлик Ғофир Хусейнов иккинчи ва самарқандлик Жамол Зокиров учинчи ўринларни банд этди.

15 февраль кунги баҳслар бироз ноқулай об-ҳаво шароитида ўтди. Жумладан, ёмғир остида кечган баҳсларда «Багги» ва миллий русумдаги «Нексия» автомобиллари майдонга тушди.

«Багги» русумидаги автомобиль ҳайдовчилари ўртасидаги баҳсда Жиззах вилоят техник ва амалий спорт турлари маркази спортчилари Ғайрат Одилов ҳамда Омон Йўлдошев биринчи ва учинчи ўринларни банд этган бўлса, «Шайхонтоҳур» ўқув спорт техника клуби вакили Август Сечкоренко маррага иккинчи бўлиб етиб келди.

«Нексия» русумидаги автомобиллар мусобақасида Жиззах вилоят техник ва амалий спорт турлари маркази спортчиси Бекзод Одилов биринчи, «Шайхонтоҳур» ўқув спорт техника клуби вакили Игорь Газиянс иккинчи ва самарқандлик Илҳом Обиджонов учинчи бўлиб келди.

Умумжамоа ҳисобида 408 очко жамғарган Жиззах вилояти жамоаси биринчи, 344 очко тўплаган Тошкент шаҳри спортчилари иккинчи ва 265 очко билан қашқадарёлик автоспорт клуби вакиллари учинчи ўринни эгаллади.

Баҳслар якунида кучли учликка кирган Ўзбекистон кубоги иштирокчиларига эсдалик совғалари топширилди.