11 ноябрь куни Nokia номи ишлатилмаган илк Lumia смартфони тақдим этилади

Microsoft компанияси 11 ноябрь куни ўзининг илк Lumia смартфонини тақдим этишни режалаштирмоқда. Бу ҳақда The Verge маълумотига асосланиб «Пароль» нашри хабар берди.

Компания ушбу кунда бўлиб ўтадиган тадбирига таклифномалар жўнатишни бошлади. Таклифномаларда эса «Microsoft кундалик мобил қурилмалар кучини барчага етказмоқда» деб ёзилган. Шу билан бирга, тадбир тизерида тўқ сариқ корпусли смартфон ҳам тасвирланган.

Расман тасдиқланмаган хабарларга кўра Microsoft 11 ноябрь куни арзон нархдаги смартфонини тақдим этади. Бироқ янги Microsoft Lumia смартфонининг қандай номланиши ҳақида маълумот мавжуд эмас. Унда 5 дюймли дисплей, 1 Гб тезкор хотира, 5 мегапикселли камера, 1,2 ГГц частотага эга Snapdragon процессори ҳамда Nokia Lumia’нинг арзон смартфонларида бўлмаган олд камера ўрнатилади.

Эслатиб ўтамиз, Microsoft компанияси Lumia смартфонларида Nokia бренди номини ишлатишдан воз кечди. Эндиликда ушбу смартфонлар Microsoft Lumia деб номланади.

Шунингдек, «Пароль» нашрида қуйидаги мақолаларни ҳам ўқишингиз мумкин:

• Янги Apple iPhone 6s смартфонида 3D тасвирларни кўрсата оладиган дисплей ўрнатилиши мумкин;
• Кўприк устида селфи суратга тушаётган қиз 4,5 метр баландликдан йиқилиб ҳалок бўлди;
• Samsung Galaxy Note 4 камерасининг фойдаланувчиларга кўпроқ ёқадиган асосий имкониятлари эълон қилинди.