Қалинлиги 7,1 миллиметр бўлган iPhone 6 Plus смартфони билан ўтказилган бир қанча букланиш синовларидан кейин, ундан ингичкароқ iPad Air 2 планшети ҳам букланмаслигига ишонмайдиганлар топилди. Бу ҳақда Phonearena.com маълумотига асосланиб «Пароль» нашри хабар берди.
Иккита YouTube фойдаланувчиси iPad Air 2 планшетининг букланишига оид видеороликларни тақдим этишди. Биринчи видеода янги iPad Air 2 планшети қўл билан жуда осон ва «қўрқинчли» даражада букланди.
Иккинчи видео эса биринчи видео тақдим этилганидан бир неча соат ўтиб YouTube’га жойланган. Унда янги Apple планшети умуман букланмаслиги кўрсатилади.
Эслатиб ўтамиз, янги iPad Air 2 планшети 16 октябрь куни тақдим этилган эди ва унинг қалинлиги 6,1 миллиметрни ташкил этади. Шу боис ушбу гаджет дунёнинг энг ингичка планшети номини олди.
Изоҳ (0)